Baga­legt að Sig­ríður og Helgi Magnús geti ekki unnið saman

Þetta sagði Þorbjörg Sigríður Gunnlaugsdóttir dómsmálaráðherra að loknum fyrsta fundi ríkisstjórnar Kristrúnar Frostadóttir í hádeginu í dag.

Hún segir að fyrsta skrefið á degi tvö í embætti hafi verið að eiga stuttan fund í ráðuneytinu þar sem hún hafi óskað eftir fyrirliggjandi gögnum málsins. Hún segist ætla að taka sig tíma í að skoða þau.

„Ég þekki þetta mál upp að því marki sem það hefur verið rekið í fjölmiðlum. Þannig að ég þarf að setjast yfir gögnin. Það er auðvitað ekki gott að þetta sé staðan hjá ákæruvaldinu í landinu. Það blasir við af umfjöllun fjölmiðla hvað þarna er að gerast. Ég átta mig á því að ábyrgð mín í þessu máli er að liðka til þarna,“ segir Þorbjörg.

Fær engin verkefni

Líkt og greint hefur verið frá þá sneri Helgi Magnús aftur til starfa hjá embætti ríkissaksóknara á föstudag en hann hafði verið í veikindaleyfi að undanförnu. Honum var hins vegar ekki úthlutað neinum verkefnum og sagðist Sigríður Friðjónsdóttir ríkissaksóknari í skilaboðum til hans fyrir viku að hans vinnuframlags væri ekki óskað.

Aðspurð um hvort að þetta sé hnútur sem enginn annar en ráðherra geti höggvið segist Þorbjörg að hún ætli ekki að svara neinum spurningum um það akkúrat í dag.

„Ég ætla að skoða hvernig í þessu liggur. En ég vil ekki draga það. Ef til þess kemur að ég þurfi að taka einhverja ákvörðun þá vil ég að það gerist fyrr en seinna.“

Bagaleg staða

Ráðherra segir það mjög bagalegt að ríkissaksóknari og vararíkissaksóknari geti ekki unnið saman. „Samfélagslegu hagsmunirnir, almannahagsmunirnir í þessu máli eru auðvitað að ákæruvaldið í landinu sé starfshæft, að ákæruvaldið í landinu varðveiti trúverðugleika sinn og njóti trausts almennings. Svona mál hjálpa auðvitað ekki til í þeim efnum.

En í dag er Þorláksmessa og það er að renna í garð hátíð ljóss og friðar þannig að ég vona að það sé eitthvað sem menn meðtaka líka hjá embætti ríkissaksóknara, leyfi jólahátíðinni að líða og svo skoðum við málið í framhaldinu,“ segir Þorbjörg.

Almennt séð – og þú hefur nú unnið hjá þessu embætti – er ekki æskilegt að þeir sem starfa hjá saksóknaraembættinu gæti orða sinna í samfélaginu um tiltekin mál, upp á að gæta hlutleysis kerfisins?

„Sannarlega. Og það er meginregla hjá ákæruvaldinu að gæta þess einmitt að með málflutiningi sínum séu saksóknarar að gæta að hlutleysi sínu, gæta hlutlægni. Það kemur líka ágætlega skýrt fram í áliti fyrrverandi dómsmálaráðherra. En eins og ég segi þá ætla ég að fá að skoða betur hvað er að gerast akkúrat núna, forsöguna. En þessi meginregla er algerlega óumdeild.“

Þessi staða sem uppi er, getur hún haldið áfram í langan tíma að þínu mati?

„Nei, hún getur það auðvitað ekki. Eins og ég segi, verkefni fyrir dómsmálaráðherra á hverjum tíma, og áhyggjuefni dómsmálaráðherra á hverjum tíma, er ef upp er komin einhver sú staða að sem gerir það að verkum að það eru hnökrar í í jafn mikilvægri starfsemi og ákæruvaldið er. Þannig að þetta er ekki góð staða og hana þarf að leysa. Ég ætla ekki og get ekki veitt nein svör akkúrat í dag um hver sú lausn er en svona getur ástandið auðvitað ekki verið.“