Leitar enn að fallegasta stað í heimi

Svava Marín Óskarsdóttir skrifar 17. mars 2025 07:03

Aníta Rós sýnir lesendum Vísis hina hliðina þessa vikuna.

„Dansinn hefur alltaf átt hug minn og síðustu sex ár hefur hann spilað stærra hlutverk í mínu lífi. Ég fór að vinna töluvert meira í greininni, bæði með því að koma fram sjálf en einnig sem danshöfundur,“ segir listakonan og flugfreyjan Aníta Rós Þorsteinsdóttir sem stofnaði nýverið viðburðarfyrirtækið Upplakk.

Aníta Rós segir að sviðslistir séu henni í blóð bornar. Móðir hennar, Birna Björnsdóttir, er danshöfundur og eigandi Dansskóla Birnu Björns, og móðursystir hennar er leik- og söngkonan Selma Björnsdóttir.

„Í dag starfa ég sem dansari, danshöfundur, söngkona og flugfreyja. Ég elska fjölbreytnina sem fylgir öllum þessum störfum og finnst reynsla mín á ólíkum sviðum nýtast mér í þeim öllum. Ég er frekar ofvirk og á það til að taka of mikið að mér í einu, sem getur verið bæði kostur og galli í mínu fari,“ segir Aníta Rós.

Aníta tók eftirminnilega þátt í Söngvakeppninni í fyrra með með laginu Stingum af og komst í úrslit þar sem Hera Björk Þórhallsdóttir bar sigur úr býtum.

Sjá: VÆB og Aníta komust áfram í Söngvakeppninni

Nýverið eignaðist Aníta sitt fyrsta barn, Hildi Lóu, sem er fjögurra mánaða, og segist hún njóta þess að vera í núinu með litlu fjölskyldunni sinni.

Aníta Rós sýnir lesendum Vísis hina hliðina þessa vikuna.

Fullt nafn? Anita Rós Þorsteinsdóttir

Aldur? 28 ára

Starf? Söngkona, dansari, danshöfundur og flugfreyja í orlofi.

Fjölskylduhagir? Bý með kærastanum mínum, Hermanni Árnasyni og dóttur okkar Hildi Lóu sem er fjögurra mánaða.

Lýstu sjálfri þér í þremur orðum: Hvatvís, fyndin og metnaðarfull.

Hvað er á döfinni? Ég er í fæðingarorlofi, er að læra að slaka á og njóta þess að vera í núinu. En ég er mjög virk og er alltaf með puttana í einhverju. Ég var að stofna fyrirtækið Uppklapp sem tekur að sér verkefni tengd dansi og sviðsframkomu, nóg um að vera þar!

View this post on Instagram

A post shared by Uppklapp (@uppklapp)

Þín mesta gæfa í lífinu? Litla fjölskyldan mín.

Hvað sérðu þig eftir tíu ár? Vonandi búin að gefa út meiri tónlist, enn að brasa í sviðslistum og búin að ferðast meira. Eignast hús með fjölskyldunni minni, hamingjusöm og sátt.

Hvað viltu upplifa áður en þú deyrð? Sjá meira af heiminum.

Besta heilræði sem þú hefur fengið?

Let them.

Hvað hefur mótað þig mest? Að vera elst í systkinahópi.

Hvað gerirðu til að endurhlaða batteríin? Horfi á gott sjónvarp, tek allt of langt facetime við vinkonu eða spila við Hermann.

Uppskrift að drauma sunnudegi? Sofa út, brunch, sund, stríla sig smá upp, út að borða og leikhús.

Uppáhalds staðurinn á heimilinu? Rúmið.

Fallegasti staður á landinu? Vestmannaeyjar.

En í heiminum? Ég á enn eftir að finna hann.

Hvað er það fyrsta sem þú gerir þú vaknar? Gef brjóst.

En það síðasta sem þú gerir áður en þú ferð að sofa? Hlusta á podcast.

Hugarðu að heilsunni, þá hvernig? Já, ég reyni að æfa reglulega og borða næringaríkan mat. Ég er í mömmuþjálfun og að byrja í fjarþjálfun hjá Salvöru Eyþórs vinkonu minni. Svo eru danstímar í DBB skemmtilegasta hreyfingin!

Hvað ætlaðir þú að verða þegar þú yrðir stór? Söngkona, dansari og leikkona. Fyrst var það samt hafmeyja og tannlæknir.

Hvenær fórstu að gráta síðast og af hverju? Örugglega yfir einhverju TikTok myndbandi.