Guðlaugur Victor Pálsson og félagar í Plymouth Argyle unnu stórsigur í ensku b-deildinni í kvöld.
Plymouth fylgdu á eftir bikarsigri á Liverpool um helgina með því að vinna 5-1 sigur á Millwall.
Þetta var annar deildarsigur Plymouth í röð og sá þriðji í röð í öllum keppnum. Fram að því hafði liðið ekki unnið síðan 11. janúar eða í fjórum leikjum í röð.
Guðlaugur Victor kom inn í byrjunarliðið og stóð sig vel.
Hann lagði upp þriðja mark liðsins á 53. mínútu sem Mustapha Bundu skoraði.
Fyrsta markið var sjálfsmark á 8. mínútu og annað markið skoraði Ryan Hardie úr víti á 10. mínútu. Draumabyrjun.
Fjórða markið skoraði síðan Ryan Hardie á 56. mínútu.
Millwall minnkaði muninn en Nikola Katic innsiglaði sigurinn á 86. mínútu með fimmta markinu.
