Frið­jón sakar eigin­mann Heiðu Bjargar um karl­rembu

Hrannar er eiginmaður Heiðu Bjargar Hilmisdóttur, var lengi aðstoðarmaður Jóhönnu Sigurðardóttur og nú framkvæmdastjóri ADHD-samtakanna. Grein Vals Grettissonar blaðmanns Heimildarinnar virðist hafa gert Hrannari einkar gramt í geði. Þar er fjallað um það þegar meirihlutinn í borginni sprakk.

„Samsæriskenningarrant eftir Hrannar Björn“

Þetta hefur svo leitt til þess að fram fara meirihlutasamræður borgarstjórnarmeirihlutans milli þeirra Samfylkingar, Pírata, Flokks fólksins, Sósíalistaflokksins og Vinstri grænna.

Sigrún Einarsdóttir, sem aðstoðar oddvitana við meirihlutaviðræður, segir fréttastofu að ekki verði veitt viðtöl í dag. Hópurinn nýti tímann í dag í vinnu saman.

„Ég fékk nokkuð kómíska sendingu áðan, skjáskot af samsæriskenningarranti eftir Hrannar Björn Arnarsson, sem eiginmanns starfandi oddvita Samfylkingarinnar í borgarstjórn. Þar afhjúpar Hrannar karllæga sýn sína á stjórnmálin,” segir Friðjón á Facebook-síðu sinni nú rétt í þessu.

Spunakarlarnir Friðjón, Einar og Valur

Friðjón birtir skjáskot af færslu Hrannars þar sem Hrannar fer ófögrum orðum um skrif Vals, en hann segir Friðjón og Einar Þorsteinsson jafnframt hafa haldið um penna. Hrannar vitnar í svargrein við grein Vals eftir fjóra borgarfulltrúa Samfylkingarinnar þar sem segir: 

„Enginn fótur er fyrir því að oddviti Samfylkingarinnar hafi öskrað á oddvita Framsóknarflokksins á þessum lokaða fundi, eins og fullyrt er í grein Heimildarinnar. Furðu sætir að mark sé tekið á slíku slúðri í blaði sem vill láta taka sig alvarlega en lætur sér engu að síður sæma að birta langloku þar sem enginn viðmælandi er nefndur á nafn.“

Friðjón telur þessi skrif Hrannars benda til þess að hann telji karla véla um pólitíkina.

„Við Einar Þorsteinsson og Valur Grettisson sitjum víst við spunavélar Heimildarinnar og hönnum söguna. Nú þekki ég ekki hvernig pólitíkin gengur fyrir sig í því hliðsetta flokksbroti Samfylkingarinnar Hrannar tilheyrir, en það er óvænt ef það er eftir allt saman karlarnir sem eru aðalleikarar en konurnar í aukahlutverkum,“ segir Friðjón.

Hvað sem öðru líður eru þessar væringar til marks um að hiti sé nú tekinn að færast í meirihlutaviðræðurnar og virðist sá hiti vera á báða bóga.