Ó­geð­felldar lýsingar í á­kæru á hendur Kristjáni Markúsi

DV greindi fyrst frá þessu, en fréttastofa hefur ákæruna undir höndum.

Þess er krafist fyrir hönd konunnar að Kristján greiði henni sex milljónir króna.

Kristján Markús hefur sjö sinnum hlotið dóm fyrir ofbeldisbrot, síðast í nóvember þegar hann var sakfelldur fyrir að ráðast á konu með kertastjaka en hún hlaut höfuðkúpubrot og mar á heila. Árið 2015 hlaut hann fjögurra ára og níu mánaða fangelsisdóm vegna tveggja frelsissviptinga.

Rétt er að vara lesendur við lýsingum sem fram koma í fréttinni að neðan.

Það sem hann er nú ákærður fyrir er beita konuna ofbeldi frá byrjun nóvember til 10. þess sama mánaðar, en það var um það leyti sem hann hlaut áðurnefndan dóm.

Honum er gefið að sök að slá konuna víðsvegar í líkama og höfuð, meðal annars með hleðslusnúru, hamri, járnröri og tréspýtu. Þá er hann sagður hafa slegið hana í andlitið með kveikjara og lagt logandi sígarettur að hálsi hennar.

Jafnframt er hann ákærður fyrir að taka höndum um háls konunnar, þrengja að og stinga hana í líkamann með sprautunálum, skera fótleggi hennar með hníf. Þar að auki er hann sagður hafa stigið og traðkað á báðum fótleggjum hennar, og sparka víðs vegar í líkama hennar, og hrækja framan í hana, og líka skvetta vatni á hana.

Samkvæmt ákæru hlaut konan fyrir vikið mikla áverka, en í ákæru er þeim lýst með þessum hætti.

Þar að auki er Kristján ákærður fyrir vörslu á nokkrum grömmum af fíkniefnum, og fyrir að hafa fimm haglaskot og .45 kalíbera skothylki sem lögregla lagði hald á daginn sem málið kom upp.

Sagðist aldrei hafa séð annað eins

Lögreglu barst tilkynning um málið um miðjan dag 10. nóvember síðastliðinn. Það var bráðamóttaka Landspítalans sem greindi lögreglu frá málinu, en þangað var konan komin vegna líkamsmeiðinga sem hún hafði orðið fyrir dagana á undan. Hjúkrunarfræðingur sagðist aldrei hafa séð aðra eins áverka.

Konan sagði Kristján hafa veitt sér áverkana og í kjölfarið var hann handtekinn á heimili sínu og vettvangur tryggður. Leit var gerð á heimili hans. Lögreglan lagði hald á föt, lak, sem og hamar og dúkahníf. Þá voru tekin sýni af blóði sem fannst á veggjum í svefnherbergi heimilisins.

Neitaði sök

Daginn eftir að konan fór á bráðamóttökuna tók lögregla skýrslu af Kristjáni. Hann neitaði alfarið sök.

Hann sagðist hafa þekkt konuna í um það bil mánuð og hún ætti það til að fá gistingu hjá honum. Hann sagðist hafa tekið eftir áverkum á henni og aðstoðað hana við að búa um þá.

Breytti framburði sínum

Á Þorláksmessu gaf konan síðan aðra skýrslu. Þá sagði hún að Kristján Markús hefði ekki veitt henni alla áverkana, og í raun hefði hún átt upptök að átökum þeirra á milli.

Konunni þætti ósanngjarnt að Kristján, sem hefur neitað sök, sitji í gæsluvarðhaldi fyrir eitthvað sem hann hafi ekki gert. Hún sagðist ekki hafa verið beitt þrýstingi til að breyta frásögn sinni. Samband hennar og Kristjáns væri gott.

Hún sagðist eingöngu muna að hún hefði vaknað heima hjá Kristjáni með áverka, án þess að geta nefnt þá sem voru á staðnum eða hver hefði valdið áverkunum. Hún og Kristján hefðu rifist, og hún átt upptökin að rifrildunum. Þá hefði komið til slagsmála þeirra á milli og hún þá kýlt Kristján en hann sparkað í hana.

Konan er sögð engu geta svarað um hvar þessi átök hafi átt sér stað. Hún hafi borið fyrir sig að hún hafi verið í mikilli neyslu.

Þrátt fyrir þennan nýja framburð konunnar var það niðurstaða Lansdréttar í janúar að Kristján skyldi sitja áfram í gæsluvarðhaldi. Dómurinn vísaði til ítarlegs og samhljóða framburðar konunnar í fyrri skýrslutökum sem samrýmist rannsóknargögnum málsins.