Að­eins þúsund geta mætt á leikina mikil­vægu við Noreg og Sviss

Leikirnir við Noreg og Sviss fara fram föstudaginn 4. apríl og þriðjudaginn 8. apríl, báðir klukkan 16:45.

Leikið verður á Þróttarvelli og verða þetta fyrstu A-landsleikirnir sem þar fara fram. Stelpurnar okkar hafa áður spilað á Kópavogsvelli, þegar ekki er hægt að spila á Laugardalsvelli, en í þetta sinn varð Þróttarvöllur fyrir valinu og komast aðeins um 1.000 áhorfendur fyrir.

Miðasalan fer fram á Stubb.is og er miðaverð 3.500 krónur fyrir fullorðna en 1.750 fyrir 16 ára og yngri.

Ísland hóf Þjóðadeildina á tveimur útileikjum þar sem liðið gerði markalaust jafntefli við Sviss og tapaði 3-2 fyrir Frökkum. Liðið er því með eitt stig líkt og Sviss en Frakkland er efst með sex stig og Noregur með þrjú.

Mikið er í húfi fyrir Ísland að halda sér í A-deild fyrir næsta tímabil en þá verður spilað um sæti á HM. Aðeins neðsta lið riðilsins fellur beint í B-deild en liðið í 3. sæti fer í umspil um að forðast fall. Efstu tvö liðin eru örugg um að halda sér í A-deild og fer efsta liðið auk þess í undanúrslit Þjóðadeildarinnar.

Vonir standa til þess að framkvæmdum á Laugardalsvelli ljúki í tæka tíð svo að síðasti heimaleikur Íslands í Þjóðadeildinni, gegn Frakklandi 3. júní, verði leikinn þar. Ef það gengur ekki eftir fer sá leikur einnig fram á Þróttarvellinum.