Fram­lengja sam­starf sem hefur komið tugum sprota á lag­girnar

Í fréttatilkynningu þess efnis segir að hraðallinn hafi skilað þátttakendum miklum árangri frá því að honum var hrundið af stað fyrir fimm árum, en í dag séu starfandi 32 fyrirtæki sem hafa farið í gegnum hraðalinn og samanlagt starfi hjá þeim 150 manns. 

3,5 milljarða króna tekjur á ári

Rekstrartekjur þessara fyrirtækja nemi um 3,5 milljörðum króna á ársgrundvelli og heildarverðmæti sem hraðallinn hefur skapað því umtalsverð. Meðal sprota sem hafi komist á laggirnar megi nefna Plaio, Quick lookup, Opus Futura og Livey, sem hafi þróað ólíkar hugbúnaðarlausnir, sem hafi vakið verðskuldaða athygli hér heima og erlendis.

„Með Startup Supernova erum við að skapa vettvang þar sem frumkvöðlar úr ólíkum atvinnugreinum fá tækifæri til að vaxa og þróa hugmyndir sínar þannig að þær verði spennandi fyrir alþjóðlega fjárfesta og sjóði. Það er lykilatriði að íslenskir frumkvöðlar hugi strax að því hvernig þeir geti skalað upp lausnir sínar til að ná lengra. Við erum virkilega ánægð með að halda áfram þessu öfluga samstarfi með Nova næstu þrjú árin – það skiptir máli að leiðandi fyrirtæki taki virkan þátt í að styðja nýsköpun á Íslandi,“ er haft eftir Ástu Sóllilju Guðmundsdóttur, framkvæmdastjóra Klak – Icelandic Startups.

Stökkpallur fyrir nýsköpun

Startup Supernova hefjist fimmtudaginn 15. maí með Klúðurkvöldi í verslun Nova í Lágmúla 9, þar sem opnað verði fyrir skráningar í hraðalinn. Opið verði fyrir umsóknir til og með 18. júní, en þá hefjist Superclass vinnustofan, sem fari fram dagana 19. til 20. júní. Að vinnustofunni lokinni verði tíu teymi valin til þátttöku í sex vikna viðskiptahraðli, sem hefjist 5. ágúst.

„Við erum ótrúlega stolt af þeim árangri sem sprotarnir hafa náð í gegnum Startup Supernova hingað til og hlökkum til að styðja áfram við frumkvöðla með stórar hugmyndir. Við hjá Nova elskum nýsköpun og vinnum sjálf stöðugt að því að hreyfa við nálinni og viljum skora á aðra til að gera það líka. Með Startup Supernova höfum við skapað stökkpall fyrir einmitt þetta. Við sjáum líka að hraðallinn hefur skapað mikið virði fyrir íslenskt viðskiptalíf og samfélagið allt. Við erum því mjög spennt fyrir áfamhaldandi samstarfi með hraðalinn næstu ár,“ er haft eftir Þuríði Björgu Guðnadóttur, framkvæmdastjóra markaðssóknar hjá Nova.