Mbuemo sagður vilja fara til Manchester United

Mbuemo er 25 ára kamerúnskur framherji sem sýndi sínar allra bestu hliðar á síðasta tímabili, þegar hann skoraði tuttugu mörk og gaf sjö stoðsendingar í ensku úrvalsdeildinni.

Stórlið á borð við Arsenal, Newcastle og Tottenham hafa sýnt honum áhuga en hann er sagður vilja fara til Manchester United, sem er einnig áhugasamt. David Ornstein hjá The Athletic greindi frá í gærkvöldi.

Thomas Frank, þjálfari Brentford, sagði í síðasta mánuði að félagið væri tilbúið að selja Mbuemo „fyrir rétt verð.“ Sem eru um eða yfir sextíu milljónir punda, samkvæmt Sky Sports.

Ljóst að Mbuemo myndi styrkja framlínu United manna mikið, en þeir gengu einnig frá kaupum á Matheus Cunha frá Wolves á dögunum.

Þá gætu einhverjir leikmenn verið á förum frá félaginu, Bruno Fernandes hefur verið orðaður við skipti til Sádi-Arabíu og Alejandro Garnacho hefur einnig verið orðaður við brottför.