Handbolti

Janus Daði og fé­lagar tryggðu sér odda­leik um titilinn

Óskar Ófeigur Jónsson skrifar
Nú héldu Janus Daði Smárason og félagar í SC PICK Szeged út og tryggðu sér þar með oddaleik um ungverska meistaratitilinn.
Nú héldu Janus Daði Smárason og félagar í SC PICK Szeged út og tryggðu sér þar með oddaleik um ungverska meistaratitilinn. Getty/Javier Borrego

Íslendingaliðin Szeged og Veszprém þurfa að spila hreinan úrslitaleik um ungverska meistaratitilinn í handbolta en þetta var ljóst eftir úrslit kvöldsins.

Janus Daði Smárason og félagar í Szeged tryggðu sér oddaleik um titilinn með fimm marka sigri á heimavelli sínum í kvöld.

Szeged vann leikinn 32-27 eftir að hafa verið 15-12 yfir í hálfleik.

Szeged var mest fimm mörkum yfir í fyrsta leiknum en missti leikinn frá sér og Veszprém vann þá tveggja marka endurkomusigur. Veszprém gat því tryggt sér titilinn þriðja árið í röð í kvöld en tókst ekki.

Nú mætast liðin í þriðja sinn og þá geta bæði liðin orðið meistari. Szeged varð síðast meistari 2022.

Janus skoraði þrjú mörk fyrir Szeged í kvöld en hann var með sjö mörk í fyrsta leiknum.

Bjarki Már Elísson skoraði þrjú mörk fyrir Veszprém og Aron Pálmarsson var með eitt mark.

Aron spilaði mjög lítið í leiknum eða rétt tæpar þrjár mínútur.




Fleiri fréttir

Sjá meira


×