Bieber í basli: „Ég veit að ég er skemmdur“

Undanfarna mánuði hefur Bieber birt margar færslur sem þótt hafa sérkennilegar á Instagram og sömuleiðis hefur hann birt mjög margar færslur á köflum. Þetta hefur leitt til töluverðrar umræðu um geðheilsu stórstjörnunnar.

Sjá einnig: Hefndi sín í tilefni af feðradeginum

Í færslu sem hann birti á Instagram í dag skrifaði Bieber að fólk væri sífellt að segja honum að jafna sig.

„Haldið þið að ef ég gæti bætt mig væri ég ekki löngu búinn að því?“ spurði Bieber. Hann sagðist einnig meðvitaður um að hann væri skemmdur og að hann ætti í vandræðum með skap sitt.

Bieber sagðist hafa reynt alla sína ævi að verða betri, eins og fólk hafi ítrekað sagt honum.

„Það hefur bara gert mig enn þreyttari og reiðari.“

Hann sagði Jesús þann eina sem fengi hann til að reyna að láta líf sitt snúast um aðra.

„Því ég er ef satt skal segja örþreyttur á því að hugsa um mig að undanförnu,“ skrifaði Bieber og spurði fylgjendur sína hvort þeir væru ekki einnig þreyttir á því.

Kallaði fyrrverandi vin sinn aumingja

Færslan einlæga kemur, eins og bent er á í frétt E, í kjölfar annarrar þar sem Bieber birti skjáskot af samskiptum sínum við fyrrverandi vin sinn. Á þeim skjáskotum virtist Bieber skamma þennan vin sinn fyrir að reyna að draga úr tilfinningum sínum og segist ekki gera það fyrir nokkurn mann.

„Átök eru hluti af sambandi. Ef þér líkar ekki við reiði mína, líkar þér ekki við mig,“ skrifaði Bieber. Hann sagði reiðina vera viðbrögð við þeim sársauka sem hann hefði orðið fyrir.

Þá virtist Bieber segja vin sinn vera kvikindislegan fyrir að biðja særða manneskjum um að vera ekki særð.

Vinurinn sagðist ekki vanur því að veist væri að sér með þessum hætti en sagðist skilja og finna fyrir reiði Biebers, samkvæmt skjáskotinu.

Við það virtist Bieber reiðast og sagði vináttunni lokið. Hann myndi ekki sætta sig við að maður líkti reiði hans við það að veitast að einhverjum.

„Ég var ekki að grínast þegar ég sagði þér að ég þyrfti ekki á þér að halda sem vini,“ skrifaði Bieber.

„Ég á góða vini. Sem virða þessi mörk mín.“

Því næst kallaði hann þennan fyrrverandi vinn sinn aumingja, sendi honum fingurinn og sagði honum að láta sig í friði.

Þegar vinurinn spurði: „Er ég aumingi?“ svaraði Bieber með því að blokka hann.