Gular við­varanir í kortunum

Á vef veðurstofunnar segir að viðvaranirnar taki gildi upp úr hádegi og verði í gildi til miðnættis. Búist sé við austan allhvössum vindi, 15-20 m/s og séu aðstæður því varasamar fyrir vegfarendur með aftanívagna eða ökutæki sem taka á sig mikinn vind.

Í hugleiðingum veðurfræðings segir að skil nálgist landið og því verði austan kaldi eða stinningskaldi í dag. Yfirleitt verði skýjað með köflum en að mestu þurrt. Uppúr hádegi byrji að rigna sunnanlands en úrkomusvæðið færist síðan norður yfir landið og í kvöld verði væta í flestum landshlutum. Hita er spáð 8 til 17 stigum, hlýjast norðan- og vestanlands.

Á morgun sé útlit fyrir norðaustan 5-13 m/s. Hvassast verði á Vestfjörðum og við suðausturströndina. Rigningu er spáð með köflum á austanverðu landinu en skúrir á vesturhlutanum. Hiti verði frá fimm stigum við austurströndina upp í sextán stig norðvestanlands.

Veðurhorfur á landinu næstu daga

Á sunnudag:

Norðaustan 3-8 m/s, en 8-13 við norður- og suðausturströndina. Dálítil rigning eða súld, en stöku skúr vestantil. Hiti frá 7 stigum við norðausturströndina, upp í 16 stig á Suðvesturlandi.

Á mánudag:

Norðaustan 3-8 m/s, en 8-13 við norður- og austurströndina. Rigning eða súld, en dálitlar skúrir sunnan- og vestanlands. Hiti 6 til 14 stig, hlýjast á Vesturlandi.

Á þriðjudag:

Austlæg eða breytileg átt og væta af og til, einkum sunnan- og vestanlands. Hiti 6 til 12 stig.

Á miðvikudag:

Norðaustlæg átt og dálítil rigning eða súld, en skýjað með köflum og þurrt að kalla norðantil. Hiti 7 til 15 stig, svalast við austurströndina.

Á fimmtudag:

Austan- og norðaustanátt og rigning með köflum, en bætir í úrkomu er líður á daginn. Hiti breytist lítið.

Á föstudag:

Útlit fyrir ákveðna norðaustanátt með rigningu, en úrkomulítið suðvestanlands.