„Lands­lið barna“ tekið til starfa á Suður­nesjum

Að ráðinu standa Reykjanesbær, Suðurnesjabær, Grindavíkurbær, Vogar, Framkvæmdanefnd um málefni Grindavíkur, Samband sveitarfélaga á Suðurnesjum, Heilbrigðisstofnun Suðurnesja, Heilsugæslan Höfði, Fjölbrautaskóli Suðurnesja, Ungmennaráð Suðurnesja, Embætti lögreglustjóra á Suðurnesjum og Sýslumanns á Suðurnesjum, auk Svæðisstöðvar íþróttahéraða.

„Stofnun Farsældarráðs Suðurnesja er sögulegt skref fyrir landshlutann okkar,“ segja bæjarstjórar sveitarfélaganna, Magnús Stefánsson, Halldóra Fríða Þorvaldsdóttir, Guðrún P. Ólafsdóttir og Fannar Jónasson sameiginlega,.

„Við stöndum þétt saman, með öllum lykilaðilum í þjónustu við börn og fjölskyldur, til að tryggja þeim bestu mögulegu tækifærin í lífinu. Ráðið er skýrt merki um metnað og vilja til að tryggja að kerfin okkar virki fyrir þau sem þau eiga að grípa og styðja.“

Ráðið er hið fyrsta sinnar tegundar á Íslandi og var sett á laggirnar í kjölfar samþykktar stjórnar Sambands sveitarfélaga á Suðurnesjum og samstarfssamnings við mennta- og barnamálaráðuneytið. Í tilkynningu segir að með stofnun ráðsins hefjist nýr kafli í þverfaglegu samstarfi ríkis, sveitarfélaga og félagasamtaka í landshlutanum.

Allir sem veita börnum þjónustu saman

Samkvæmt farsældarlögum er gert ráð fyrir að svæðisbundin farsældarráð verði stofnuð víðar um landið. Sú reynsla og þekking sem byggist upp á Suðurnesjum geti því orðið leiðarvísir fyrir önnur svæði.

„Stofnun Farsældarráðs Suðurnesja markar tímamót í að efla þjónustu við börn og fjölskyldur á svæðinu og undirstrikar sterkan vilja sveitarfélaganna og þjónustuveitenda til að forgangsraða farsæld barna. Með þessu framtaki stíga Suðurnesin mikilvægt skref sem leiðandi afl í þróun nýrra lausna í þágu barna á landsvísu og móta fordæmi fyrir aðra landshluta“ sagði Hjördís Eva Þórðardóttir, verkefnastjóri farsældar barna á Suðurnesjunum. Hún ræddi stofnun ráðsins í Bítinu á Bylgjunni í morgun.

„Þetta er í fyrsta skipti sem við náum saman öllum þjónustuveitendum, allir sem veita börnum og fjölskyldum þeirra einhvers konar þjónustu eða stuðning, öllum saman við eitt borð,“ sagði Hjördís Eva í viðtalinu.

Með því sé búið að búa til „landslið barna“ á Suðurnesjum. Næstu skref séu að finna blinda bletti í kerfinu og hvernig sé hægt að byggja göng þarna á milli í kerfi. Hún segir markmiðið að öll börn á Suðurnesjum fái tækifæri til að láta ljós sitt skína, en einnig að tryggja að öll börn, óháð stöðu eða tekjum foreldra, fái sömu tækifæri til að blómstra og dafna.

Hún segir þrettán prósent barna á Suðurnesjum af erlendum uppruna. Það myndu einhverjir líta á það sem áskorun, sem það sé, en það verði líka að líta á það sem styrkleika.

„Það er ótrúlega mikið sem sem við getum fengið með nýju fólki og öðru sjónarhorni og annarri menningu inn í íslenskt samfélag,“ segir Hjördís Eva. Suðurnesin hafi verið leiðandi í þessu.

Hægt er að hlusta á viðtalið að neðan en þar fór hún yfir stofnun ráðsins, Suðurnesin sjálf, seiglu íbúanna og möguleikana sem ráðið stofnar til.

Í tilkynningu segir að meginmarkmið ráðsins sé að efla og samræma þjónustu við börn og fjölskyldur með samþættri, snemmtækri og heildstæðri nálgun. Þetta feli meðal annars í sér að styrkja samstarf, tryggja jöfn tækifæri barna til þátttöku, náms og félagslegrar virkni þvert á kerfi. Einnig er lögð áhersla á forvarnir og snemmtækan stuðning í virku samráði við börn og foreldra.

Bera sameiginlega ábyrgð

Stofnun ráðsins byggir samkvæmt tilkynningu á öflugum grunni samstarfs sem hefur þróast á Suðurnesjum undanfarin ár, í gegnum verkefni á borð við Velferðarnet Suðurnesja, Höldum glugganum opnum og Öruggari Suðurnes.

Í tilkynningu segir að samkvæmt farsældarlögunum beri sveitarfélögin sameiginlega ábyrgð á starfsemi ráðsins. Þátttaka barna og ungmenna sé lykilatriði í starfi þess og eigi því ungmennaráð sveitarfélaga á Suðurnesjum fjóra fulltrúa í ráðinu.

„Það er gríðarlega mikilvægt fyrir okkur að fá sæti við borðið þar sem ákvarðanir eru teknar sem hafa áhrif á líf okkar,“ sögðu fulltrúar ungmennaráðs Suðurnesja við undirritunina. „Farsældarráðið gefur okkur tækifæri til að láta raddir okkar heyrist og tryggja að þjónusta á Suðurnesjum sé í takt við raunverulegar þarfir okkar.“

Móta svæðisbundna fjögurra ára áætlun

Skipulag ráðsins byggir á fjórum einingum: Farsældarráðinu sjálfu, framkvæmdahópi, tímabundnum verkefnahópum og faghópi.

Framkvæmdahópurinn starfar í umboði ráðsins og hefur umsjón með innleiðingu ákvarðana, þar á meðal undirbúningi aðgerðaáætlunar. Verkefnahópar verða settir á fót eftir þörfum og faghópur sinnir faglegu mati og ráðgjöf. Verkefnastjóri farsældar, sem starfar í umboði Sambands sveitarfélaga á Suðurnesjum, annast daglega framkvæmd og undirbúning funda.

Innan tólf mánaða frá stofnun ráðsins verður mótuð svæðisbundin fjögurra ára aðgerðaáætlun um farsæld barna, byggð á kortlagningu styrkleika og áskorana á svæðinu.