Neymar hlustaði á hjartað sitt

Neymar er orðinn 33 ára gamall en fór aftur heim í Santos til að koma sér aftur á fulla ferð eftir meiðsli.

Hann talaði strax um að snúa aftur til Evrópu sem fyrst en það verður smá bið á því. Neymar framlengir þó samning sinn aðeins um hálft ár og gæti því verið kominn til Evrópu í janúar.

„Ég tók ákvörðun og hlustaði á hjartað mitt. Santos er ekki aðeins mitt félag. Þetta er heimili mitt, hér liggja rætur mínar og saga. Hérna breyttist ég úr strák í karlmann og hér er ég elskaður,“ sagði Neymar.

Barcelona keypti Neymar á sínum tíma frá Santos en hann var svo seldur fyrir heimsmetupphæð til Paris Saint Germain.

Það gekk ekki eins vel hjá honum hjá PSG og hjá Barcelona og hann hefur verið mikið meiddur síðustu ár.

Tími hans í Sádí Arabíu rann nær algjörlega út í sandinn vegna meiðsla og hann endaði á því að fara heim til Brasilíu.

Meiðsladraugurinn hefur elt hann þangað en vonandi sjáum við hann sýna sitt besta á næstu mánuðum.