Nýr liðsfélagi Ís­lendinganna hjá HamKam æfði undir fölsku nafni

Íslensku leikmennirnir Brynjar Ingi Bjarnason og Viðar Ari Jónsson spila með HamKam sem er í þrettánda sæti í norsku deildinni. Framundan er hörð barátta fyrir sæti sínu í deildinni.

Nígeríumaðurinn Peter Sunday skrifaði undir samning við HamKam í dag en hann er aðeins átján ára gamall. Félagið sagði frá þessu á heimasíðu sinni.

Sunday er þó ekki nýkominn til félagsins því hann er búinn að æfa lengi með liðinu. Hann spilaði sínar fyrstu mínútur í æfingarleik á móti KFUM á dögunum.

Það er hins vegar nafn hans sem er að koma mörgum á óvart sem hafa fylgst með liði Hamarkameratene eins og það heitir nú fullu nafni.

Staðarblöðin vissu að því að það væri strákur að nafni Peter Monday að æfa með liðinu en svo er allt í einu samið við Peter Sunday. Hans rétta nafn er nefnilega Sunday en ekki Monday.

„Í heimi fótboltans þegar allir eru að leita að hæfileikaríkum leikmönnum er mikilvægt að halda spilunum þétt að sér þegar þú finnur spennandi leikmenn,“ skrifaði HamKam á heimasíðu sinni.

„Við gerðum það viljandi að kalla hann Peter Monday. Þegar þú berð slíkt nafn þá er auðvelt að grínast aðeins með það og leika sér aðeins,“ sagði Íþróttastjórinn Jörgen Björn.