ÍR-ingar gefa ekkert eftir og tóku topp­sætið aftur af Njarð­vík

Njarðvíkingar unnu Reykjanesbæjarslaginn í gærkvöldi og náðu toppsætinu. Þeir héldu því þó bara í sólarhring.

ÍR er með tveggja stiga forystu eftir 6-1 sigur á Grindavík í Breiðholtinu. Bergvin Fannar Helgason og Emil Nói Sigurhjartarson skoruðu snemma í sitt hvorum hálfleiknum.

Víðir Freyr Ívarsson (2 mörk) og Bergvin Fannar (2 mörk) bættu svo við fjórum mörkum á lokakaflanum og ÍR-ingar fögnuðu frábærum sigri.

ÍR er enn taplaust í deildinni, með sex sigra og fjögur jafntefli í tíu leikjum.

Þróttur og HK gerðu 2-2 jafntefli í Laugardalnum. Aron Snær Ingason kom Þrótti yfir á 10. mínútu en þeir Eiður Atli Rúnarsson og Birnir Breki Burknason voru búnir að koma Kópavogsliðinu yfir fyrir hlé. Liam Daði Jeffs tryggði Þrótti jafntefli þegar hann jafnaði metin á 70. mínútu.

Aron Fannar Birgisson skoraði síðan bæði mörk Selfyssinga sem komust 2-0 yfir á móti Leikni. Leiknismenn komu til baka og Dagur Ingi Hammer Gunnarsson tryggði Breiðholtsliðinu stig með tveimur mörkum.