Kristian að ganga til liðs við Twente

Kristian var einn af sjö leikmönnum sem fékk smáskilaboð frá þjálfara Ajax um síðustu helgi, þar sem var tilkynnt að þeir væru ekki hluti af framtíðaráformum félagsins.

Sjömenningarnir mega ekki æfa með aðalliðinu, leggja bílnum á bílastæði leikmanna og fá ekki pláss í búningsherbergi liðsins. Þeir fá einn sjúkraþjálfara sem þeir skipta á milli sín og mega æfa sjálfir á meðan aðalliðið fær sér hádegismat, samkvæmt De Telegraaf.

Við ömurlegar aðstæður þurfti Kristian því að leita sér að nýju liði og virðist vera að lenda hjá Twente, sem spilar einnig í hollensku úrvalsdeildinni.

Félagið er sagt hafa verið áhugasamt eftir að hafa fylgst með Kristiani í lánsdvölinni hjá Sparta Rotterdam á síðasta tímabili og ákveðið að festa kaup eftir að Kristian fékk fréttirnar um að hann ætti enga framtíð hjá Ajax.

Twente er sagt ætla að borga samninginn út, það er að segja greiða Ajax öll laun sem félagið hefði annars borgað Kristiani og semja síðan við hann upp á nýtt, en óvíst er hvort meira fé þurfti að leggja fram til að klófesta hann.