Sjö ára dómur fyrir að stinga tvo: Hittu á­rásar­manninn í fyrsta skipti þessa ný­árs­nótt

Héraðsdómur Reykjavíkur kvað upp dóm þess efnis í dag.

Atvikin sem málið varðar áttu sér stað í húsnæði Matfugls á Kjalarnesi í Reykjavík aðfaranótt 1. janúar. Dimitar var gefið að sök að leggja nokkrum sinnum til tveggja manna með hníf og reyna að svipta þá lífi. Umræddur hnífur var sagður vera með 11,5 sentímetra löngu hnífsblaði.

Sjá nánar:  Á­kærður fyrir að reyna að svipta tvo lífi

Í ákæru sagði að Dimitar hefði stungið fyrri manninn endurtekið í bakið og hinn í brjóstkassann og kviðinn. Bæði fórnarlömbin hefðu hlotið lífshættulegg sár vegna þess.

Bar fyrir sig sjálfsvörn og minnisleysi

Fyrir dómi sagði Dimitar að hann hefði beitt hnífnum í sjálfsvörn. Hann hefði verið hræddur þegar atburðir þessarar nætur hefðu átt sér stað. Kvöldið hefði byrjað rólega, matur og áfengi verið á borðum og allt verið eðlilegt.

Hann sagði tvo menn frá Póllandi hafa komið á staðinn og hann verið stressaður vegna nærveru þeirra. Stemmingin hefði breyst um miðnætti þegar menn byrjað að rífast og í kjölfarið komið til handalögmála í eldhúsinu milli eins manns frá Póllandi og annars frá Slóvakíu. Þetta hafi þróast í þá átt að fleiri en einn hefði verið að berja manninn frá Slóvakíu.

Dimitar sagðist hafa reynt að fá þá til að hætta því, en mennirnir farið að ýta við honum og lemja hann. Hann hefði fallið á gólfið og þegar hann hafi reynt að standa á fætur hefðu mennirnir sparkað í hann, bæði í búk og höfuð.

Þá hafi hann reynt að flýja og ekki vitað hvernig hnífur hafi endað í höndum hans. Hann sagðist bara muna að hann hefði haldið á hníf. Hann sagðist ekki muna eftir að hafa stungið mennina, en tveir þeirra hefðu skyndilega farið í burtu, og sá sem var frá Slóvakíu orðið einn eftir.

Jafnframt sagðist hann muna að „ein af stelpunum“ hefði komið að honum og öskrað og spurt hvað hann hefði gert. Maðurinn sagðist ekki muna hvort hann eða hún hefði tekið hnífinn og sett í vaskinn.

Hann sagðist ekki muna til þess að aðrir en hann hefðu verið með hnífa umrædda nótt.

Hitti árásarmanninn í fyrsta sinn þetta kvöld

Annar þeirra sem var stunginn lýsti því fyrir dómi að umrætt kvöld hefðu tveir menn verið að rífast. Annar þeirra hefði slegið hinn sem hafi fengið blóðnasir fyrir vikið. Þá hefði Dimitar, sem átti ekki hlut í þessum átökum, stungið þann sem sló hinn.

Strax í kjölfarið hefði Dimitar svo stungið hann.

Maðurinn sagðist ekki þekkja Dimitar, og umrætt kvöld hefði hann hitt hann í fyrsta skipti. Þá tók hann fram að enginn hefði lagt hendur á árásarmanninn áður en hann stakk þá tvo.

Heimilislaus eftir árásina

Hinn maðurinn sem var stunginn lýsti jafnframt þessum átökum sem áttu sér áður en hann var stunginn. Hann sagðist muna eftir því að Dimitar, sem hafi ekkert tengst átökunum, hefði beðið þá um að hætta. Svo hafi hann fundið þegar hann hafi verið stunginn.

Honum hafi þá verið litið á Dimitar og séð hann taka stutta sveiflu með hendinni að hinu fórnarlambinu og stinga það.

Árásin hefði haft slæm áhrif á líf hans. Nú væri hann heimilislaus og svæfi í bíl sínum.

Ekki í geðrofi eða með algjört óminni

Fram kemur í dómi héraðsdóms að eftir stungurnar hefði Dimitar hringt á Neyðarlínuna og þá hefði hann sagst hafa stungið mennina tvo í sjálfsvörn, og sagðist ekki hafa átt annarra kost á völ. Hann viðurkenndi jafnframt að hafa stungið mennina í samtali við lögreglu á vettvangi.

Að mati dómsins var því ekkert sem benti til annars en að hann hefði stungið mennina með hnífi. Lögfull sönnun væri komin á lýsingu ákærunnar, fyrir utan það að annar maðurinn hafi einungis verið stunginn einu sinni.

Með vísan til framburðar vitna og læknis taldi dómurinn að frásögn Dimitars um að hann hefði sjálfur orðið fyrir ofbeldi ekki standast.

Jafnframt var það mat dómsins að Dimitar hefði átt að vera ljóst að með því að veita mönnunum þessa áverka væri langlíklegasta afleiðinginn að þeir myndu hljóta bana. Þá var niðurstaða geðlæknis að útilokað væri a árásarmaðurinn hefð verið í geðrofi eða haft algjört óminni, og hann því sakhæfur.

Dimitar var sakfelldur fyrir tvær tilraunir til manndráps. Líkt og áður segir er hann dæmdur í sjö ára fangelsi og gert að greiða öðrum manninum sem var stunginn tvær milljónir króna í miskabætur og hinum eina og hálfa milljón. Jafnframt er honum gert að greiða tæplega sjö og hálfa milljón í sakarkostnað.