Emúinn í dyra­gættinni reyndist eiga heima á Drunk Rabbit

Halla Vilhjálms birti færslu á Facebook-hópnum Vesturbærinn um hádegi í gær með tveimur myndum af stóru tuskudýri sem leit út eins og emúi, ófleygi ástralski fulginn sem minnir um margt á strút.

„Kannast einhver við þennan sem mætti fyrir utan hjá mér í nótt…?“ skrifaði Halla við færsluna. 

Viðbrögðin stóðu ekki á sér, fjöldi fólks skrifaði ummæli við færsluna til að svara spurningunni eða grínast með atvikið. 

„Fara heim með einhvern furðufugl og þykjast svo ekki vita neitt“

„Náði einhver mynd af svipnum á þér þegar þú opnaðir fyrir þessum?“ skrifaði Haukur Magnússon við færsluna.

„Hann Finnur er alltaf að sleppa úr garðinum. Hann ratar samt heim. Gefðu honum 2-3 fíkjur og segðu honum að koma sér heim. Jesús!“ grínaðist Hilmar Þór Norðfjörð.

„Þegar þú ert barfugl og vaknar á tröppum í hverfinu... þá veistu að kvöldið var gott,“ bætti Edda Júlía Alfreðsdóttir við og Andri Hrannar Einarsson tók í svipaðan grínstreng: „Að vera helluð á djamminu og fara heim með einhvern furðufugl og þykjast svo ekki vita neitt!“

Elísabet Bettý Sigurðardóttir hafði greinilega rekist á fuglinn, eða allavega tvífara hans, í miðbænum því hún birti mynd af emúa versla við listamann í miðborginni: „Þessi var að sjoppa í bænum.“

Svo voru nokkrir sem töldu sig vita hvaðan fuglinn kæmi.

„Þessi var í anddyrirnu á Dillon,“ skrifaði hjólahvíslarinn Bjartmar Leósson og Bjarni Jónsson var á sama máli þó hann væri ekki alveg viss: „Lol ég held að hann sé frá Dillon gæti verið að ruglast samt“

Dóra Björt var á öðru máli, skrifaði „Hann á heima á Dubliner“ og birti mynd af sér með emúa.

Einn þeirra sem skrifaði ummæli við færsluna virtist þó vissari í sinni sök en hinir.

„Drunk Rabbit á hann!“ skrifaði Snæfríður Björg Jónsdóttir, rekstrarstjóri og meðeigandi Drunk Rabbit, í ummælum. Vísir bjallaði í Snæfríði til að komast að því hvort fuglinn væri frá Drunk Rabbit eða einhverjum öðrum.

Vakstjórinn tók emúinn í bíltúr

Er þetta ykkar fugl?

„Þetta er okkar fugl,“ sagði Snæfríður Björg um emúinn sem er um einn og hálfur metri á hæð.

Hafið þið saknað hans í einhvern tíma?

„Neinei, það var stuð á mánudagskvöldið og hann hefur farið heim með einhverjum sem skildi hann eftir fyrir utan hjá íbúa í Vesturbænum,“ segir Snæfríður en Drunken Rabbit er opinn til eitt virka daga.

„Ég reyndar tók ekkert eftir því að hann væri farinn fyrst um sinn. Ég er svo lengi í gang á morgnana þannig ég varð ekkert var við þetta. Í sömu andrá og ég tók eftir þessu þá sendi vinkona mín mér skjáskot af færslunni á Vesturbæjarhópnum,“ sagði Snæfríður.

Eruð þið búin að endurheimta hann?

„Vaktstjórinn á barnum á heiðurinn að því, hún fór og náði í hann og keyrði hann aftur heim,“ sagði Snæfríður. Á Facebook-síðu Drunk Rabbit má sjá úr ferðasögunni aftur heim.

Emúinn er írskt lukkudýr 

Hvað ætli útskýri þennan rugling með hina staðina. Eru svona fuglar víða eða hvað?

„Þetta er svona lukkudýr fyrir írskan líkkjör þannig að birginn sem selur þetta á Íslandi hefur dreift þeim á staðina sem selja þennan líkkjör,“ segir Snæfríður. Líkkjörinn sem um ræðir er Shanky's Whip, írskt líkkjörsmerki sem var stofnað árið 2021 og virðist njóta vinsælda.

Hefur þetta gerst áður að fuglinum sé stolið?

„Ekki svo ég viti. Við erum nýbúin að taka við rekstrinum frá fyrri eiganda þannig við erum bara búin að vera með hann opinn í mánuð. Þetta er allavega í fyrsta sinn sem honum er stolið á okkar vakt,“ sagði Snæfríður.

Og vonandi í síðasta sinn.

„Vonandi, nema þetta æsi upp lýðinn,“ sagði Snæfríður.