Hlýnar um helgina

Rafn Ágúst Ragnarsson skrifar 10. júlí 2025 06:18

Súld í dag en bráðum fer að birta til. Vísir/Vilhelm

Súld eða dálítið rigning er á vestanverðu landinu í dag með skúrum og rigningu austanlands síðar. Úrkomulítið er á Suðausturlandi og styttir víða upp í kvöld. Hiti er á bilinu 10 til 18 stig og hlýjast suðaustantil.

Á morgun er einnig rigning eða súld öðru hvoru en bjart með köflum austnalands. Samfelld rigning verður suðaustantil annað kvöld og hiti á bilinu 11 til 20 stig, hlýjast norðaustantil.

Á Grænlandshafi er smálægð, en þokast austur og beinir suðlægum áttum með vætu til landsins. Þó helst bjart og þurrt fyrir austan framan af degi, en önnur lægð suður af landinu hreyfist norður á bóginn og úrkomusvæði hennar fer yfir austanvert landið.

Þetta kemur fram í hugleiðingum veðurfræðings Veðurstofu Íslands fyrir daginn í dag. Lægðirnar fjarlægjast í kvöld og styttir þá víða upp. Suðaustlæg átt og væta með köflum á morgun, en úrkomusvæði nálgast sunnan úr hafi og kemur inn á Suðausturland um kvöldið. Fremur hlýtt í veðri, einkum norðaustanlands. Það hlýnar í veðri um helgina.

Veðurhorfur á landinu næstu daga

Á föstudag:

Suðaustlæg eða breytileg átt, 3-8 m/s og dálítil væta með köflum, bjartviðri austanlands, en fer að rigna þar um kvöldið. Hiti 11 til 19 stig, hlýjast norðaustantil.

Á laugardag:

Hæg breytileg átt og súld, en þurrt að mestu norðantil. Fer að rigna á sunnantil um kvöldið. Hiti 12 til 20 stig, hlýjast norðaustanlands.

Á sunnudag:

Fremur hæg suðlæg eða breytileg átt, skýjað að mestu og sums staðar dálítil væta, en yfirleitt bjartviðri á Austurlandi. Fremur hlýtt í veðri.

Á mánudag:

Norðaustlæg átt, bjart og hlýtt í veðri, en svalara í þokulofti við austurströndina.

Á þriðjudag og miðvikudag:

Útlit fyrir suðaustlæga átt með rigningu, en úrkomuminna fyrir norðan og kólnar dálítið í veðri.

Veður