„Við erum alls ekki í nokkru stríði“

Bílastæðamálin hafa verið áberandi í neytendaumræðunni síðustu misseri. Neytendastofa sektaði fjögur bílastæðafyrirtæki í síðasta mánuði fyrir brot gegn lögum um góða viðskiptahætti og reglum um verðmerkingar. Parka lausnir ehf. fékk hæstu sektina, eina milljón króna. 

Í góðu samtali við Neytendasamtökin

Neytendasamtökin hafa í leiðinni kallað eftir nýjum lögum eða reglugerð í málaflokknum. Breki Karlsson formaður samtakanna hefur líkt ástandinu við villta vestrið. Neytendur hafa kvartað undan háum bílastæðagjöldum, svokölluðum vangreiðslugjöldum og erfiðleikum í samskiptum við fyrirtækin. 

Freyr Ólafsson er nýr framkvæmdastjóri Parka en vika er síðan hann tók við starfinu. Í samtali við fréttastofu segir hann sekt Neytendastofu hafa átt rétt á sér og fyrirtækið leggi sig fram við að bæta það sem betur megi fara.

„Við erum alls ekki í nokkru stríði og þarna komu mjög góðar og þarfar ábendingar fram frá Neytendastofu. Og við erum í góðu samtali við Neytendasamtökin og viljum reyna að einfalda þetta. Við erum ungt íslenskt fyrirtæki og ef við lögum ekki og betrumbætum þá fara neytendur annað. Þeir eru okkur allt og við stöndum með þeim,“ segir Freyr í samtali við fréttastofu.

Ákveða ekki hvað kostar að leggja 

Athygli vakti í síðustu viku þegar kona var rukkuð um 48 þúsund krónur eftir að sonur hennar gleymdi að skrá sig úr bílastæði á gjaldsvæði P1 eftir að hafa verið í stæðinu í um fimmtán mínútur.

Móðirin, Ásdís Bjarnadóttir, lýsti erfiðum samskiptum við Parka og sagði hafa gengið brösuglega að ná sambandi við fyrirtækið. Hún staðfesti í samtali við fréttastofu á mánudag að fyrirtækið hafi endurgreitt henni gjaldið.

Freyr harmar frásögn hennar og segist feginn að málið hafi endað vel. 

Hann segir að misskilnings virðist gæta um nokkur atriði tengd starfsemi Parka, og fyrirtækið sé gjarnan haft fyrir rangri sök. Í grunninn séu það eigendur bílastæðanna sem ákveði hverjar reglurnar um gjaldtöku og verðskrá séu. Parka eigi til að mynda engin bílastæði, heldur sé hlutverk fyrirtækisins að sjá til þess að reglunum, sem eigendur bílastæðanna setja, sé framfylgt.

„Það eru bílastæðaeigendur sem ákveða verðin og við erum að gera okkar besta við að gera þetta eins þægilegt og auðvelt og hægt er,“ segir Freyr.

Þar af leiðandi sé það ekki í höndum Parka að ákveða hvort notendur sem til dæmis gleyma að skrá sig úr stæðum fái mistökin endurgreidd eða ekki. 

„Þetta er yfirleitt þannig að ef þú sendir og sýnir að þú hafir gert eitthvað vitlaust er það leiðrétt eftir bestu getu.“

Fréttastofu hafa borist ábendingar frá bæði Neytendasamtökunum og neytendum um að erfitt sé að ná sambandi við bílastæðafyrirtækin, þar á meðal Parka, þegar leiðrétta þurfi mistök við gjaldtöku. Freyr segir Parka ekki græða neitt á að erfitt sé að ná í fyrirtækið.

„Við erum bara eins og öll önnur fyrirtæki í þjónustu. Við eigum allt okkar undir að bregðast sem hraðast og best við. Við erum að mæla okkar svörunartíma og viðbrögð þannig að ef eitthvað vantar upp á þar erum við alla daga í því að reyna að gera betur.“

Skiljanlegt að eigendur vilji aðgangsstýra

Loks segist Freyr sýna því mikinn skilning að eigendur bílastæða kjósi að rukka þá sem leggja í þau, það geti skipt höfuðmáli í því hvort rekstur gangi upp eða ekki, hvort bílastæði séu aðgengileg við fyrirtæki eða þjónustu.

„Það er oft verið að koma með stórar yfirlýsingar um að fólk sé að taka peninga af notendum og gestum. Það er alltaf einhver ástæða fyrir því. Sumir eru til dæmis með fá bílastæði og eru með einhverja þjónustu og vilja endilega að þeirra raunverulegu viðskiptavinir komist að.“

Eigendur bílastæða séu til að mynda í mörgum tilfellum að sjá til þess að starfsfólk síns fyrirtækis eða fólk sem mæti á staðinn í viðkomandi erindagjörðum sé ekki rukkað, heldur einungis þeir sem ætli að nýta sér stæðin án þess að eiga þangað erindi.

„Það er fólk sem fer úr límingunum að úthrópa þetta fólk sem er að reyna að stjórna aðgengi að sínum stæðum, sem er bara að reyna að vera í góðum bissness og gera vel við sína viðskiptavini,“ segir Freyr.