Sagt að hann spili ekki aftur meðan Craig er með liðið

Æfingahópur landsliðsins var kynntur í gær og þar var nafn Kristófers hvergi að finna. Hann hefur verið utan hópsins um hríð, eftir meiðsli sem hann varð fyrir í fimmta leik úrslitakeppninnar vorið 2024. Hann var þá ekki í hópnum þegar hann var kominn aftur á fullt í mars síðastliðnum.

Vísir spurði þá landsliðsþjálfarann Craig Pedersen út í stöðuna vegna meints ósættis þeirra á milli. Craig sagði það á milli hans og Kristófers og vildi ekki tjá sig frekar.

Í samtali við íþróttadeild segist Kristófer hafa vitað það síðan í febrúar að hann færi ekki á komandi Evrópumót og kom honum því ekki á óvart að vera ekki í æfingahópi Íslands.

„Ég er búinn að vita af þessu síðan í febrúar. Að ég yrði ekki hluti af þessum hópi. Maður beið svolítið eftir því að þetta yrði gefið út. Þetta er eitthvað sem ég er búinn að vita af í svolítinn tíma,“ segir Kristófer. Það hafi honum verið ljóst eftir sáttafund með Craig í febrúar, sem fór ekki eins og hann hefði kosið.

„Fundurinn endar í raun þannig að hann segir að svo lengi sem hann er að þjálfa liðið mun ég ekki vera partur af hópnum.“

Nánar verður rætt við Kristófer í Sportpakkanum á Sýn í kvöld þar sem hann segir nánar frá samskiptunum við Craig og ræðir vonbrigðin að fá ekki að spila á EuroBasket í haust.