Hagnaðist um 2,2 billjónir króna

Samúel Karl Ólason skrifar 31. júlí 2025 09:49

Virði hlutabréfa Meta hækkaði um rúm ellefu prósent eftir lokun markaða vestanhafs í gærkvöldi. AP/Michael Dwyer

Forsvarsmenn samfélagsmiðlafyrirtækisins Meta, sem rekur meðal annars Facebook, Instagram og aðra samfélagsmiðla, birtu í gær fjórðungsuppgjör sem þykir mjög jákvætt. Fyrirtækið hagnaðist um rúma átján milljarða dala á öðrum ársfjórðungi þessa árs.

Það samsvarar um 2,2 billjónum króna.

Wall Street Journal segir þetta í fyrsta sinn á árinu sem fyrirtækið nái markmiðum og það sé líklegt til að draga úr áhyggjum fjárfesta af því hve miklum fjármunum Mark Zuckerberg, forstjóri, hefur varið til þróunar gervigreindar.

Samkvæmt miðlinum hækkaði virði hlutabréfa Meta um rúm ellefu prósent eftir lokun markaða vestanhafs í gærkvöldi.

Tekjur Meta voru 47 milljarðar dala og jukust um 22 prósent frá sama tímabili í fyrra en nánast allar tekjur fyrirtækisins eru til komnar vegna auglýsinga. Kostnaður jókst um tólf prósent milli ára.

Súlurit sem sýnir hvaðan auglýsingatekjur Meta koma.Meta

Um 3,5 milljarðar manna notuðu samfélagsmiðla Meta daglega, að meðaltali, í júní. Greinendur segja að þróun gervigreindar hjá Meta sé þegar byrjuð að borga sig gegnum auglýsingar.

Áhugasamir geta fundið frekari upplýsingar hér á fjárfestavef Meta.

Alphabet, móðurfélag Google, birti í síðustu viku uppgjör sem sýndi met í sölutekjum og Microsoft birti í gær uppgjör sem fór töluvert fram úr væntingum greinenda.

Meta Bandaríkin Uppgjör og ársreikningar Facebook