Frakkar þurfi mögu­lega að leita að­stoðar Al­þjóða­gjald­eyris­sjóðsins

„Ég get ekki fullvissað ykkur um að hættan á inngripi Alþjóðagjaldeyrissjóðsins sé ekki til staðar,“ sagði Éric Lombardy, fjármálaráðherra Frakka.

Frakkar eru í erfiðri fjárhagsstöðu sem samkvæmt NYT sé vegna mikilla ríkisútgjalda í þágu hagkerfisins vegna útgöngubanns sem var í gildi í Frakklandi á meðan heimsfaraldurinn stóð, og orkukreppunnar sem skall á Evrópu eftir innrás Rússa í Úkraínu.

Í færslu á samfélagsmiðlum sagði Lombardy hins vegar að Frakkland væri ekki í hættu á inngripi frá Alþjóðagjaldeyrissjóðnum, Evrópska seðlabankanum eða annarri alþjóðlegri stofnun. Frakkland væri að fjármagna skuldir þeirra án erfiðleika. 

Frakkar eru í gríðarhárri skuld en fjárlagahalli Frakklands nam 5,8 prósentum af vergri landsframleiðslu fyrir árið 2024. Þá jukust skuldir þeirra á fyrsta ársfjórðungi í 3,3 billjónir evra, rúmar 472 billjónir íslenskra króna. Það er meira en 114 prósent af vergri landsframleiðslu Frakklands.

Francois Bayrou, forsætisráðherra Frakka, hefur lagt til niðurskurð í fjárlögum næsta árs. Með tillögum hans sé hægt að skera niður um 44 milljarða evra, sem samsvarar 6,3 billjónum króna. Vegna fjárlaganna sækist Bayrou eftir því að franska þingið greiði atkvæði um traustsyfirlýsingar í hans þágu nú í september.

Bayrou, sem tók við embættinu í desember eftir stutta embættistíð Michel Barnier, sagði halla landsins vera hans helsta baráttumál. Hann telur að vextir af skuldum Frakklands gætu orðið stærsti útgjaldaliður ríkisstjórnarinnar árið 2029.

Í niðurskurðstillögum forsætisráðherrans felst meðal annars að ráða einungis einn opinberan starfsmann fyrir hverja þrjá sem hætta þegar þeir fara á eftirlaun og að leggja niður „óafkastamiklar“ ríkisstofnanir. Einnig á að draga úr niðurgreiðslu sýklalyfja og að leggja niður tvö hátíðardaga Frakka. Dagarnir sem urðu fyrir valinu eru annar í páskum og 8. maí þar sem fagnað er endalokum seinni heimsstyrjaldarinnar.

Frakkar eru almennt óánægðir með fjárlög Bayro. Stéttafélög hafa kallað eftir allsherjarverkfalli þann 10. september í mótmælaskyni og að auki er áðurnefnd atkvæðagreiðsla um vantrauststillögu. Leiðtogar fjögurra flokka hafa þegar lýst því yfir að þeir muni styðja tillöguna.