Englar Birnis frumsýndir og heimildar­mynd á leiðinni

Birnir hefur verið einn stærsti rappari Íslands frá því hann steig fram á sviðið fyrir átta árum. Hann gaf út fyrstu plötu sína, Matador, árið 2018 og þremur árum síðar kom Bushido út. Hann gaf út plötuna 1000 orð með tónlistarkonunni Bríeti og kom fjórða plata hans, Dyrnar, síðan út í sumar.

Platan er löng, útpæld og metnaðarfull og til að fagna útgáfu hennar hélt rapparinn stórtónleika í svipuðum dúr í Laugardalshöll 20. september síðastliðinn. 

Tónleikarnir voru mikið sjónarspil með fjölda dansara, ljósa- og grafíkveislu og tróð rjómi rappsenunnar jafnframt upp á tónleikunum. Einnig var sú nýlunda tekin upp að frumsýna nýtt tónlistarmyndband við lagið „Englar“ sem er þrettánda lagið á Dyrunum. 

„Þetta var magnað móment, að upplifa fimm þúsund manns í Laugardalshöll horfa á myndbandið,“ segir Ísak Hinriksson, leikstjóri myndbandsins, en myndbandið má sjá hér að neðan:

„Ég vissi ekki við hverju ætti að búast. Það er ekki beint vaninn að sýna tónlistarmyndbönd á miðjum tónleikum,“ segir Ísak. 

„Þetta er mjög hjartnæmt, fallegt og persónulegt lag hjá Birni og Marteini og frábrugðið öðrum lögum á plötunni,“ bætir hann við.

Birnir hefur átt viðburðaríkt ár en „Englar“ er fimmta tónlistarmyndbandið sem hann gefur út á árinu, auk Dyranna og nokkurra smáskífa. 

En það er nóg framundan hjá rapparanum, þar á meðal heimildarmynd sem hefur verið í bígerð nánast frá byrjun ferilsins.

„Við höfum fylgt Birni eftir í að verða sex ár. Myndin spannar allan tónlistarferil Birnis og segir frá hæðum og lægðum í lífi hans,“ segir Ísak. 

Myndin verður frumsýnd á næsta ári en þangað til hún kemur út geta áhorfendur látið sér nægja að horfa á tónlistarmyndbönd kappans.