Lands­bankinn hagnast um tæpa 30 milljarða á níu mánuðum

Þetta kemur fram í tilkynningu frá bankanum og fjárhagsuppgjöri hans fyrir tímabilið. Dregið hefur úr útlánum til heimila og stjórnendur gjaldfært varúðarfærslu upp á 2,4 milljarða vegna hugsanlegra áhrifa nýlegs dóms Hæstaréttar í máli gegn Íslandsbanka.

Landsbankinn greiddi síðari hluta arðgreiðslu ársins til hluthafa í september og námu arðgreiðslur ársins samtals 18,89 milljörðum króna. Íslenska ríkið á 98,2% hlutafjár í bankanum.

Arðsemi eiginfjár jókst milli ára og var 12,2% samanborið við 11,7% á sama tímabili árið áður. Á sama tíma nam vaxtamunur sem hlutfall af meðalstöðu heildareigna 2,9%.

Selt gamla Landsbankahúsið og hlut í Greiðslumiðlun Íslands

Afkoma tryggingafélagsins TM, dótturfélags Landsbankans, af vátryggingarsamningum var 1,5 milljarðar króna á tímabilinu 28. febrúar til 30. september 2025. Þar af voru 528 milljónir króna á þriðja ársfjórðungi. Samsett hlutfall TM er 88,7% á fyrstu níu mánuðum ársins 2025.

Kostnaðarhlutfall Landsbankans var 33,2% á fyrstu níu mánuðum 2025, samanborið við 32,3% á sama tímabili árið 2024. Eiginfjárhlutfall í lok tímabilsins var 24,0% en fjármálaeftirlit Seðlabanka Íslands gerir heildarkröfu um 20,4% eiginfjárgrunn.

Í júlí síðastliðnum tók Landsbankinn tilboði Landsbyggðar ehf. í Landsbankahúsið við Austurstræti 11 og Hafnarstræti 10, 12 og 14. Söluverð húsanna var 2,85 milljarðar króna.

Í dag greindi Landsbankinn einnig frá því að hann hafi selt hlut sinn í Greiðslumiðlun Íslands ehf. (GMÍ) til Símans. GMÍ rekur innheimtufyrirtækið Motus og lánaþjónustuna Pei. Eignarhlutur Landsbankans í félaginu var 47,9% og er heildarvirði þess metið á 3,5 milljarða króna í viðskiptunum sem eru háð samþykki Samkeppniseftirlitsins. 

Gjaldfæra varúðarfærslu upp á 2,4 milljarða vegna dóms Hæstaréttar

Lilja Björk Einarsdóttir, bankastjóri Landsbankans, segir afkomuna á fyrstu níu mánuðum ársins vera góða og sömuleiðis afkoman af tryggingum TM. 

„Kostnaðarhlutfall á fyrstu níu mánuðum ársins var 33% og hefur sjaldan verið lægra. Í kjölfar dóms Hæstaréttar höfum við gjaldfært varúðarfærslu upp á 2,4 milljarða vegna þess hluta lánasafns bankans sem varðar fasteignalán til neytenda,“ segir Lilja í tilkynningu og vísar þar til dóms í máli gegn Íslandsbanka þar sem skilmálar óverðtryggðs láns með breytilegum vöxtum voru dæmdir ólögmætir. Landsbankinn bíður þess að Hæstiréttur taki fyrir svipað mál gegn bankanum.

Samdráttur í íbúðalánum

„Útlánavöxtur var hóflegur og var allur hjá fyrirtækjum. Við gerum ekki ráð fyrir miklum útlánavexti á næstunni og við finnum fyrir hægari umsvifum hjá fyrirtækjum, líkt og fjallað er um í nýrri hagspá Greiningardeildar Landsbankans sem kom út í gær. Þá varð samdráttur í íbúðalánum sem skýrist af því að fleiri velja verðtryggð lán hjá lífeyrissjóðum. Við munum leggja okkur fram við að bjóða samkeppnishæf íbúðalán, hvort sem er fyrir fyrstu kaupendur eða aðra,“ bætir Lilja við.

„Í kjölfar dóms Hæstaréttar í máli Íslandsbanka erum við nú að fara fara yfir skilmála um breytilega vexti á nýjum íbúðalánum og er sú vinna á lokametrunum. Landsbankinn er stærsti lánveitandinn á íbúðalánamarkaði og við höfum lagt áherslu á að vinna þetta mál hratt og vel enda mikilvægt að draga úr óvissu eins og kostur er við þessar aðstæður.“

Í tengslum við söluna á eldra húsnæði Landsbankans bætir Lilja við að bankinn hafi þar með minnkað við sig og fermetrum í rekstri verið fækkað um 40% á síðustu árum. 

Fréttin hefur verið uppfærð.