„Eini hópurinn sem hjálpaði mér að vera ég sjálfur“

Þrír stjörnu­leikir verða spilaðir og er frítt inn fyrir börn en fyrir litlar 500 krónur geta full­orðnir keypt miða en að­gangs­eyrir rennur óskiptur í ferða­sjóð special olympics liðs Hauka sem er ætlað börnum með fat­lanir.

Körfu­bolta­vika special olympics stendur nú yfir í Evrópu og Bára Fann­ey, þjálfari hjá Haukum, segir sína leik­menn mjög spennta fyrir laugar­deginum þar sem að þau munu spila með og á móti leik­mönnum úr efstu deild og lands­liðum Ís­lands.

„Þetta verður geggjuð upp­lifun. Þau hafa verið dug­leg að mæta á leiki hjá meistara­flokkum og líka á lands­leiki. Þau þekkja þessa leik­menn og því mikil spenna bæði fyrir því að spila á móti þeim en líka að vera með þeim í liði.“

Fann sig í körfuboltanum

Ed­vard Þór Ingvars­son er einn þeirra leik­manna sem tekur þátt í stjörnu­leikjunum þremur. Það er margt við körfu­boltann hjá Haukum sem heillar hann.

„Vinirnir sem þú færð með því. Þú getur hlupið, gert allt sem þú vilt, skotið á körfuna eins oft og þú getur. Það er alltaf gaman. Ég byrjaði að æfa þegar að ég fékk ein­hverfu­greininguna þegar að ég var ellefu ára. Ég var bara að reyna finna íþrótt sem væri fyrir mig og þetta var í raun eini hópurinn sem hjálpaði mér að vera ég sjálfur.“

Einstaklingum mætt þar sem þeir eru

Og góðu áhrifin sem körfu­bolta­iðkunin hefur á Ed­vard fara ekki fram hjá móður hans, Helgu Kristínu Ol­sen.

„Ed­vard Þór er búinn að prófa ýmsar íþrótta­greinar og maður er alltaf að reyna finna hvað hentar og passar sem og hvar áhuga­sviðið liggur. Hann byrjaði sem sagt í körfu­boltanum hér hjá Haukum fyrir um sex og hálfu ári síðan og þetta svona smell­passaði. Þarna fann hann sig al­gjör­lega. Það er náttúru­lega svo rosa­lega mikilvægt fyrir alla að finna fyrir því að þeir séu góðir í ein­hverju. Hér er unnið frábært starf, mikil hvatning í gangi og ein­stak­lingum er mætt þar sem að þeir eru. Svo er það félags­legi þátturinn sem skiptir okkur for­eldrana gríðar­lega miklu máli. Hann fær alveg útrás fyrir það hér í Haukunum.“

Hún segir stjörnu­leiki dagsins ekki bara eftir að nýtast krökkunum hjá Haukum heldur einnig þeim stjörnum sem munu spila með og á móti þeim.

„Þau eru með heil­mikið keppnis­skap hjá okkur og gríðar­legar fram­farir sem hafa orðið hjá þeim undan­farin ár. Það er meiri­háttar sem for­eldri að taka eftir fram­förum, ekki bara hjá sínu eigin barni heldur hjá hans félögum. Ég held að þetta eigi líka eftir að gefa þeim leik­mönnum sem eru að koma sem gestir til okkar heil­mikið. Því þú færð ekki betri og skemmti­legri körfu­bolta­menn heldur en þessa.“

Samfélag sem er að stækka

Margir leik­manna Hauka eru að fara spila á stórum velli, sérút­búnum treyjum og með al­vöru um­gjörð eins og sést í efstu deild í fyrsta skipti

„Þessir krakkar mæta rosa­lega vel á æfingar,“ segir Bára þjálfari. „Þau eru áhugasöm, vilja læra körfu­bolta, bæta sig og keppnis­skapið hjá þeim er mikið. Þeim finnst ótrú­lega skemmti­legt að keppa.“

Hingað til hefur lið Hauka þurft að fara er­lendis til þess að keppa við önnur special olympics lið og er mark­miðið með stjörnu­leikjunum að safna í ferða­sjóð fyrir liðið svo það geti keppt á fleiri mótum er­lendis. En stutt gæti þó verið í að þau geti mætt svipuðum liðum hér á Ís­landi því mikil gróska hefur verið í því starfi.

„Það frábæra við þetta er að special olympics körfu­bolta­sam­félagið hér á Ís­landi er að stækka. Njarðvík byrjaði með lið núna í október, Vestri á Ísafirði hefur nú verið með starfandi lið í tvö ár og á Akur­eyri hafa verið körfu­boltanám­skeið og Fylkir býður upp á körfu­boltaæfingar fyrir heyrnar­skerta þar sem þjálfarinn notar tákn­mál. Svo er í boði hjólastólakörfu­bolti. Það er svo gaman að sjá þetta sam­félag stækka og fleiri lið koma upp, við hlökkum bara til að fá að keppa á móti öðrum special olympics liðum hér á landi.“

Mun gefa allt í leikina

Ed­vard er afar spenntur fyrir leikjum dagsins, hann býst við þó við erfiðum leikjum

„Ég held að við munum tapa.“

En þið gefið allt í þetta?

„Já, alltaf.“