Vilja banna að sýna frá barnaíþróttum á netinu

Sænskum íþróttahreyfingum er nú ráðlagt frá því að senda út frá barnaíþróttum í sínum íþróttagreinum. Sænska frjálsíþróttasambandið hefur þegar tekið ákvörðun um að hætta slíkum útsendingum.

Engin ástæða tl að sýna börn

„Það er engin ástæða fyrir okkur að sýna börn,“ sagði David Fridell, framkvæmdastjóri sænska frjálsíþróttasambandsins, í samtali

Í byrjun september gaf Íþróttasamband Svíþjóðar út nýjar leiðbeiningar um útsendingar frá barnaíþróttum. Þá var það látið eftir hverju sérsambandi að taka sína eigin ákvörðun en þeim voru gefnar tvær skýrar ráðleggingar:

Íþróttasamband Svíþjóðar mælir með því að hvert sérsamband sem hefur barna- og unglingastarfsemi útbúi leiðbeiningar eða sambærilegt fyrir streymi, þar sem hluta starfseminnar má meta sem hentuga til streymis eftir íþróttalegar og lagalegar íhuganir og þegar metið hefur verið að það sé framkvæmanlegt.

Aðeins þegar það er talið réttlætanlegt

Almenn ráðlegging Íþróttasambands Svíþjóðar er sú að sérsambönd og félög ættu almennt að forðast að streyma, og að streymi frá unglingaíþróttum ætti aðeins að eiga sér stað þegar það er talið réttlætanlegt eftir vandlega íhugun.

Í samtali við Sportbladet gefa landssambönd handbolta og innanhússbandýs, sem og hestaíþrótta og sunds, til kynna að þau séu nú að endurskoða leiðbeiningar sínar í þessum greinilega viðkvæma málaflokki.

Kannski verið of hröð

„Tækniþróunin hefur verið hröð. Að vissu leyti hefur hún kannski verið of hröð. Bara af því að maður getur gert eitthvað þýðir það ekki sjálfkrafa að maður eigi að gera það. Þetta er eitthvað sem öll íþróttahreyfingin þarf að skoða nánar og þess vegna er mjög áríðandi fyrir okkur að gera greiningu á því hvernig nýjar leiðbeiningar Íþróttasambands Svíþjóðar skuli innleiddar innan hestaíþrótta,“ skrifar sænska hestaíþróttasambandið í svari til Sportbladet.

„Okkur finnst að það þurfi að vera sérstakar ástæður til að sýna börn á þennan hátt og það er engin ástæða fyrir okkur að sýna börn í þeim keppnum sem við berum ábyrgð á og sendum út í gegnum okkar vettvang,“ sagði Fridell en hvað um það að geta aflað peninga og fengið kynningu fyrir íþróttina sína með því að sýna frá keppnum barna og unglinga?

Vekur vissulega upp tilfinningar

„Þróunin sem á sér stað vekur vissulega upp tilfinningar, og fyrir einstaka íþróttaforeldra eða aðstandendur er gríðarlega mikið gildi í því að geta séð barnið sitt þótt þú getir ekki verið á staðnum. En við sem samband getum ekki litið á það sem nauðsyn að veita þá þjónustu,“ sagði Fridell.