Verðbólguaukning vegna vöru­gjalda: „Þetta er nú nokkuð meira en við gerðum ráð fyrir“

Greiningardeild Landsbankans greindi í gær frá spá sinni um að breytingar á gjaldtöku hins opinbera af rekstri og kaupum ökutækja gætu aukið verðbólgu um 0,7 prósentustig. Óvíst væri hvort áhrifin kæmu fram að öllu leyti í janúar eða dreifðust yfir næstu mánuði, en telja mætti að það ylti ekki síst á eftirspurn eftir bílum í byrjun árs.

Smári Jökull Jónsson fréttamaður ræddi málið við Daða Má Kristófersson, fjármála- og efnahagsráðherra, að loknum ríkisstjórnarfundi í gær.

Landsbankinn reiknar með sjö sinnum meiri aukningu en ráðuneytið

„Þetta er nú nokkuð meira en við gerðum ráð fyrir og okkar haglíkön sýndu fram á. Það er hins vegar þannig að núna um áramótin eru ekki bara að verða breytingar á vörugjöldum, heldur er það líka þannig að verð á bílum hefur verið að hækka. Þannig að ég ætla ekki að rengja spána, en þetta er meira en það sem við höfum gert ráð fyrir.“

Daði Már segir að útreikningar ráðuneytisins hafi bent til þess að verðbólguaukning yrði frekar af stærðargráðunni 0,1 til 0,2 prósentustig.

Hefur ekki forsendur til að gagnrýna spána

Spá Landsbankans hafi komið honum á óvart en hann geti ekki gagnrýnt hana, hann viti hreinlega ekki á hvaða forsendum hún er byggð.

„Það getur verið að þarna blandist saman breytingar á innkaupsverði bíla og vörugjöldunum. Það er líka ekki víst að það hafi verið tekið tillit til þess að gert var ráð fyrir breytingum á bæði bensíngjaldi og olíugjaldi um áramót, sem auðvitað ekki varð vegna þess að bæði bensíngjald og olíugjald voru felld niður.“

Hvernig gengur baráttan við verðbólguna?

„Ekki eins vel og ég hefði viljað. Það er alveg ljóst að það hvílir núna á herðum þessarar ríkisstjórnar, og mínum, að standa við það að halda okkur við aðhald í rekstri ríkisins og ná jafnvægi á næsta ári.“