Kappahl og Newbie opna á Ís­landi

Þetta kemur fram í tilkynningu frá Alberti Þór Magnússyni, öðrum eiganda smásölufélagsins LKA19 ehf. Þar segir að áætlað sé að allar verslanirnar opni í vor í helstu verslunarmiðstöðum á höfuðborgarsvæðinu og víða á landsbyggðinni. Samhliða verði opnaðar netverslanir Newbie.is og Kappahl.is.

Greint var frá því í síðustu viku að S4S ehf. hefði undirritað samning við sænska félagið Lindex AB um að S4S tæki við sem umboðsaðili vörumerkisins Lindex á Íslandi. Þau Albert og Lóa opnuðu fyrstu Lindex-verslunina árið 2011 en alls hafa verið reknar tíu verslanir víða um land og starfsmenn verið um hundrað. Þau Albert og Lóa eiga og reka einnig Ginu Tricot, Mango í Smáralind og barnafataverslanirnar Emil og Línu og Mayoral.

Um Kappahl segir í tilkynningunni að það hafi verið stofnað í Svíþjóð árið 1953 og reki í dag 345 verslanir í Svíþjóð, Noregi, Finnlandi, Póllandi og Bretlandi.

„Fyrirtækið hefur fest sig í sessi sem eitt af leiðandi tískuvörumerkjum Skandinavíu, með ríka áherslu á sjálfbærni, sígildar grunnflíkur, undirfatnað og tískufatnað fyrir konur, karla og börn.

Um Newbie

Newbie er barna- og lífsstílsvörumerki Kappahl, elskað víðsvegar um Norðurlönd og í Bretlandi fyrir mjúk lífræn efni, rómantísk skandinavísk mynstur og tímalausa hönnun sem ætluð er að endast og ganga milli kynslóða. Newbie verslanir eru 25 en vörumerkið er einnig selt í völdum Kappahl-verslunum sem og á netinu,“ segir í tilkynningunni.

Fullkomin tímasetning

Þar er einnig haft eftir Elisabeth Peregi, forstjóra Kappahl Group, að íslenskir viðskiptavinir hafi lengi óskað eftir vörumerkjum félagsins og „nú þegar við höfum fundið frábæran samstarfsaðila er tímasetningin fullkomin til að stíga inn á íslenska markaðinn.“

„Albert og Lóa hafa sýnt fram á einstaka hæfni í uppbyggingu tískuvörumerkja á Íslandi. Við gætum ekki hugsað okkur betri samstarfsaðila til að leiða þetta sögulega skref fyrir Kappahl og Newbie. Við erum full eftirvæntingar að bjóða íslenskum viðskiptavinum að upplifa Kappahl/Newbie heiminn sem einkennist af góðum gæðum, samfélagslegri ábyrgð og fallegri hönnun,” segir Peregi.

Þá er einnig haft eftir þeim Alberti Þór og Lóu Dagbjörtu að þau hafi dáðst að Kappahl og Newbie í mörg ár, ekki aðeins fyrir skandinavíska hönnun og gæði, heldur einnig að gildum fyrirtækisins, leiðandi stöðu í sjálfbærni og einlæga virðingu fyrir fjölskyldum og samstarfsfólki. „Að vera valin fyrsti sérleyfishafi Kappahl Group á heimsvísu er mikill heiður. Við erum afar stolt að hefja þennan nýja kafla og hlökkum mikið til að taka á móti íslenskum viðskiptavinum inn í heim Kappahl og Newbie,“ segja þau Albert Þór og Lóa Dagbjört.

Dagsetningar opnana fyrir hverja verslun verða tilkynntar á næstu misserum.