„Höfum séð liðið brotna í sömu að­stæðum“

Það vann ýmis­legt á móti ís­lenska liðinu gegn Ung­verjum á þriðjudaginn síðastliðinn. Þegar að sóknar­leikurinn klikkaði steig Viktor Gísli upp í markinu og ákvarðanir dómara­t­eymi leiksins voru á köflum ansi furðu­legar. Aðstæður þar sem Strákarnir okkar gerðu vel í að halda haus og klára verk­efnið og tryggja sér tvö stig inn í milli­riðilinn.

„Ég hafði alltaf á til­finningunni að Ung­verja leikurinn yrði erfiður,“ segir Rúnar Kára­son, fyrr­verandi lands­liðs­maður í sam­tali við íþrótta­deild. „Það virðist vera ein­hver sál­fræði­leg hindrun þar og í ljósi sögunnar undan­farin stór­mót. Ég held það sé ótrú­lega mikilvægt að vinna þann leik bara eins erfitt það var og mikið mótlæti frá dómurunum og annað. Ég held það hafi gefið liðinu ógeðs­lega mikið upp á fram­haldið að gera.“

„Mér finnst við hafa séð liðið brotna í sömu aðstæðum síðustu tvö stór­mót. Maður sá það á strákunum að þeir létu þetta ekki slá sig út af laginu, þeir lögðu allt í sölurnar og í ótrú­lega erfiðum leik þar sem þeir náðu sínu besta fram. Ótrú­lega vel gert að stíga þessa hindrun al­gjör­lega og kaffæra henni.“

Þýðir ekki að kvarta yfir svona hlutum

Ung­verjarnir engin Grýla í þetta skiptið en ís­lenska lands­liðið varð fyrir áfalli í leiknum þegar Elvar Örn Jóns­son, einn mikilvægasti leik­maður liðsins fór meiddur af velli. Í gær var greint frá því að hann hefði handar­brotnað og verði ekki meira með á EM.

„Elvar er bara gríðar­lega þýðingar­mikill fyrir okkur og ekki hægt að tala neitt í kringum það. Ég er nú samt bara þannig þenkjandi og dreg einnig reynslu frá fyrri lands­liðs­verk­efnum mínum þegar ég segi að þegar maður hefur verið kvarta yfir svona hlutum þá yfir­leitt kemur það ekkert sér­stak­lega vel út. Það eru öll lið að glíma við meiðsli.“

Elvar sé frábær leik­maður sem tekur ótrú­lega mikið til sín í spiltíma og orkuútláti í vörn sér­stak­lega. 

„Þá hjálpar hann líka helling til í sókninni þó það sé kannski hlut­verk sem minnkar eftir því sem líður á mótið því þá hefur mikilvægi hans í vörninni yfirleitt aukist. Núna er hann bara ekki með, það er glatað og við eigum miklu frekar að horfa á lausnirnar heldur en vanda­málin finnst mér. Miðað við það sem ég sá til liðsins í gær þá ætla þeir sér ein­hverja hluti á þessu móti. Það verður bara að vera án Elvars núna.“

Ekkert gefins

Í milli­riðli, sem hefst á föstu­daginn, bíða leikir gegn Svíþjóð, Króötum Dags Sigurðs­sonar, Slóveníu og Sviss. Tvö efstu lið milli­riðilsins fara áfram í undanúr­slit. Það hefur gengið vel hingað til hjá ís­lenska lands­liðinu en það er ekkert gefið í hand­bolta.

„Miðað við það sem maður hefur séð á stór­mótum hingað til þá eiga lið yfir­leitt einn glataðan leik. Við bitum í það súra epli í fyrra að hitta á svo­leiðis leik gegn Króötum, við sjáum Danina tapa í gær fyrir Portúgal. Við verðum bara að vinna Króatíu og Svíþjóð, það er bara þannig. Ég held það verði þessi þrjú lið sem munu berjast um þessi tvö undanúr­slitasæti.

Það er kannski Sviss sem er fyrir fram slakasti and­stæðingur okkar fram undan en það er ekkert gefins í hand­bolta. Liðið sem er hundrað pró­sent á deginum er yfir­leitt liðið sem vinnur leikinn. Það er ekki nóg að vera betri á pappír, þú verður bara að sýna þig og sanna í hverjum einasta leik.“