Bauluðu á Vance af „evrópsku stolti“

Baulað var á J.D. Vance, varaforseta Bandaríkjanna, þegar honum og Ushu eiginkonu hans brá fyrir á risaskjá á San Siro-vellinum þegar vetrarólympíuleikarnir voru settir í síðustu viku.

Kaja Kallas, utanríkismálastjóri ESB, var spurð út í uppákomuna. Hún sagði að Bandaríkjastjórn hefði sagt ýmislegt óvinsamlegt um Evrópu.

„Almenningur okkar er auðvitað líka stoltur, evrópskt stolt. Þannig að það sést,“  sagði Kallas við Euronews í dag.

Samskipti Evrópu og Bandaríkjanna hafa farið stirðnandi frá því að Donald Trump tók aftur við völdum vestanhafs í fyrra. Ekki síst hefur ásælni Trump í Grænland og hótanir um að hann gæti mögulega beitt valdi til þess að sölsa það undir sig vakið ugg í Evrópu.

Vance hefur verið hvað harðorðastur Bandaríkjamannanna í garð Evrópu.

Þannig hefur bandarískir varaforsetinn sakað evrópsk stjórnvöld um að reyna að bæla niður tjáningarfrelsið vegna tilrauna þeirra til þess að takmarka hatorðsorðræðu og upplýsingafals á samfélagsmiðlum. Hann hefur einnig sagt innflytjendastefnu Evrópuríkja stefna vestrænni siðmenningu í voða. Hvoru tveggja endurspeglast í þjóðaröryggisáætlun sem stjórn Trump kynnti í vetur.