Typpið í lagi en skórnir of stórir

Austurríski skíðastökkvarinn Daniel Tschofenig fékk ekki að keppa í úrslitum á Vetrarólympíuleikunum vegna þess að skórnir hans voru fjórum millimetrum of stórir. Tschofenig, 23 ára, hafði komist í úrslitin á laugardag en lýsti yfir vonbrigðum með sjálfan sig þegar hann var í raun dæmdur úr leik vegna mistaka.

„Ég notaði nýja skó á æfingu,“ sagði hann við austurríska ríkisútvarpið ORF. „Ég var ekki alveg ánægður með þá en hélt þeim samt. Því miður var ég barnalegur og athugaði ekki stærðirnar. Það var ótrúlega heimskulegt af mér,“ sagði Daniel Tschofenig. Daily Mail segir frá.

Þótti líklegur

Austurríkismaðurinn vann heimsbikarinn á síðasta ári og var einn af þeim sem þóttu líklegastir til að ná árangri um helgina þar til búnaður hans var skoðaður skömmu eftir fyrsta stökkið.

Eftir að hafa fengið 137,7 stig virtist hann hafa komist í úrslitin en fljótlega varð ljóst að svo yrði ekki. Þessi 23 ára gamli keppandi var dæmdur úr leik þegar búnaður hans var skoðaður á eftir

Atvikið átti sér stað aðeins nokkrum dögum eftir að nýjar aðgerðir til að taka á meintu typpastækkunarhneyksli sem hefur yfirtekið leikana komu í ljós, þar á meðal nýjar þrívíddarskannanir á kynfærasvæði íþróttamanna.

„Typpamálið“, tók yfir leikana

Málið, sem er þekkt sem „typpamálið“, tók yfir leikana í Mílanó-Cortina á furðulegan hátt, með óstaðfestum fullyrðingum um að karlkyns skíðastökkvarar hafi gripið til þess að sprauta hýalúrónsýru í kynfæri sín til að ná samkeppnisforskoti.

Fyrir þetta tímabil og Ólympíuleikana var skíðamönnum gert að láta mæla líkama sinn með þrívíddarskanna.

Þegar íþróttamenn gangast undir skönnunina verða þeir aðeins að vera í „þröngum nærfötum“, þar sem klofahæð þeirra er einnig mæld til að ákvarða stærð keppnisbúningsins til að tryggja að búningarnir hafi aðeins tveggja til fjögurra sentímetra vikmörk.

Því stærri bungan, því lengra fljúga þeir

Þetta er til að koma í veg fyrir að íþróttamenn eigi við búninga sína til að ná forskoti. Vísindarannsóknir benda til þess að hvers kyns aukning á yfirborði skíðabúnings geti í raun breytt stökkvaranum í mannlegan svifdreka. Því stærri bungan, því lengra fljúga þeir.

Rannsókn í tímaritinu Frontiers leiddi í ljós að hverjir tveir sentímetrar í ummáli búnings minnkuðu loftmótstöðu um fjögur prósent og juku lyftikraft um fimm prósent – sem jafngildir 5,8 metrum til viðbótar í stökklengd.

Hýalúrónsýra, þegar henni er sprautað í karlkyns lim, getur aukið ummál typpisins um einn til tvo sentímetra. Notkunin myndi leyfa karlkyns skíðastökkvurum að klæðast stærri búningum, sem myndi bæta loftaflfræðilega eiginleika þeirra.

Nýju aðgerðirnar sem Alþjóðaskíðasambandið (FIS) kynnti fyrir leikana til að taka á meintu vandamáli fela í sér örmerki sem ekki er hægt að eiga við og keppendur verða að fara í gegnum eftirlitsstöðvar áður en þeir keppa.