Tiger Woods úti­lokar ekki þátt­töku á Masters

Tiger hefur glímt við mikil meiðsli í baki og gekkst undir sína sjöundu aðgerð á síðasta ári, þar sem hryggjarlið var skipt út fyrir gervidisk. Nokkrum mánuðum áður hafði hann slitið hásin.

Þar að auki er Tiger orðinn fimmtugur og tæknilega séð gjaldgengur á gamlingjatúrinn, PGA mótaröð eldri kylfinga.

Hann útilokar samt ekki endurkomu á golfvöllinn og vinnur hart að því dags daglega. Hann segist byrjaður að sveifla kylfunni að fullu en vantar enn aðeins upp á formið. 

Á blaðamannafundi í dag var hann spurður spjörunum úr og sýndi lítinn áhuga, samkvæmt The Athletic, þangað til talið færðist að Masters. 

Tiger var spurður hvort hann útilokaði endurkomu.

„Nei“ sagði hann einfaldlega, einbeittur á svip.

„Ég held áfram að reyna. Ég held áfram að vinna í því, að verða sterkari, að reyna að auka úthaldið og koma mér í nógu gott stand til keppa á hæsta stigi“ bætti hann svo síðar við.

Tiger spilaði síðast á golfmóti í júlí 2024 en hefur unnið þrekvirki fyrir golfíþróttina síðan þá, sem erindreki og opinber talsmaður íþróttarinnar, en einnig sem stjórnarmaður í hinum ýmsu samtökum og fyrirtækjum.