Herðir á frosti í kvöld

Á vef Veðurstofunnar segir að það verði él á norðan- og austanverðu landinu, en þurrt í öðrum landshlutum.

Frost verður á bilinu núll til fimm stig yfir daginn. Lægir og herðir á frosti í kvöld.

„Á morgun verður hæg breytileg átt og yfirleitt bjart veður, en stöku él fyrir norðan og austan. Vaxandi austanátt eftir hádegi, 5-13 m/s um kvöldið, en 13-18 við suðurströndina. Frost 0 til 5 stig yfir hádaginn.

Á sunnudag verður austan 5-13 og bjart með köflum, en áfram 13-18 syðst á landinu. Dálítil él norðan- og austantil framan af degi og líkur á smáéljum við suðurströndina, annars þurrt að kalla. Frost 1 til 6 stig, en rétt yfir frostmarki við suðurströndina,“ segir í hugleiðingum veðurfræðings.

Veðurhorfur á landinu næstu daga

Á laugardag: Gengur í norðaustan 5-13 m/s og 13-18 með suðurströndinni síðdegis. Dálítil él norðan- og austanlands, en þurrt og bjart sunnan heiða. Frost 2 til 8 stig.

Á sunnudag: Norðan og norðaustan 5-13 og él, en þurrt sunnan- og suðvestanlands. Frost 0 til 6 stig.

Á mánudag: Breytileg átt og lengst af þurrt, en snjókoma um tíma vestantil seinnipartinn. Frost 2 til 10 stig, kaldast norðanlands.

Á þriðjudag: Breytileg átt framan af degi en snýst í norðvestlæga átt síðdegis. Snjókoma um tíma í flestum landshlutum og áfram frost um allt land.

Á miðvikudag: Suðlæg átt og él eða snjókoma, en úrkomulítið austanlands. Frost 2 til 12 stig, kaldast norðantil og inn til landsins.

Á fimmtudag: Útlit fyrir breytilega átt með snjókomu í flestum landshlutum. Frost 3 til 8 stig.