„Ég er bara ekki nógu góður“

Glasner á nú þegar að yfirgefa félagið í sumar en er undir mikilli pressu eftir að hafa stýrt liðinu til aðeins eins sigurs í fimmtán síðustu leikjum í öllum keppnum.

Í þessari hrinu er meðal annars tap í enska bikarnum gegn Macclesfield, sem leikur í sjöttu efstu deild, en það er sama keppni og Glasner vann í eftirminnilegum sigri á Wembley á síðasta ári. Þá hafa stuðningsmenn á útivelli kallað eftir brottrekstri hans eftir jafntefli gegn Zrinjski Mostar í Sambandsdeild Evrópu í miðri viku.

„Maður veit aldrei“

Austurríski þjálfarinn gerði enga tilraun til að styrkja stöðu sína fyrir leikinn gegn botnliði Wolves á sunnudaginn og sagði á blaðamannafundi: „Við skulum sjá hvað framtíðin ber í skauti sér. Maður veit aldrei,“ sagði Glasner.

„Ég hef alltaf sagt þetta og þetta er ekki fyrsti blaðamannafundurinn þar sem ég gæti bara endurtekið sjálfan mig. Eins og ég sagði, á endanum ertu alltaf háður leikmönnum þínum og þeir munu fá allan stuðning eins og alltaf, og svo sjáum við til,“ sagði Glasner.

Glasner virtist einnig gagnrýna eigin hæfni til að hvetja liðið áfram áður en hann fylgdi því eftir með jákvæðara mati á fyrri árangri sínum á Selhurst Park.

„Ég er alltaf raunsær“

„Ég er alltaf raunsær og við erum ekki á okkar besta stað núna. Ég skil það og ég tek ábyrgð á öllu því ég ber ábyrgð á öllu liðinu,“ sagði hann.

„Eins og staðan er núna er ég bara ekki nógu góður til að koma í stað leikmannanna sem við seldum. Ég er bara ekki nógu góður til að aðlaga nýju leikmennina þannig að við spilum á sama hátt og áður og ég er ekki nógu góður til að við ráðum við leikjaálagið sem við höfum haft,“ sagði Glasner.

„Á hinn bóginn var ég nógu góður til að spila besta tímabil sögunnar, vinna tvo titla [enska bikarinn og Samfélagsskjöldinn] og einnig til að líta til baka á 32 stig eftir 26 leiki,“ sagði Glasner.

Allir reiðir, vonsviknir og pirraðir

Til varnar núverandi stöðu bætti hann við: „Ég lít til baka því mér finnst gaman að líta stundum til baka – Crystal Palace hefur aðeins tvisvar staðið sig betur. Einu sinni var það á okkar tímabili í fyrra og einu sinni árið 2021.“

„Það lítur út fyrir að jafnvel núna, þegar allir eru algjörlega reiðir, vonsviknir og pirraðir, séum við að spila betra tímabil í ensku úrvalsdeildinni en átta af síðustu 10 tímabilum sem Crystal Palace hefur spilað. Við spilum í Evrópukeppni og það er raunveruleikinn,“ sagði Glasner.