Bjarni Fritz­son: „Svo­leiðis eru sigur­vegarar, þeir vilja bara vinna leikinn“

ÍR leiddi leikinn allt fram á lokamínúturnar þar sem leikmenn virtust ætla að missa sigurinn yfir til KA. Allt kom þó fyrir ekki og skoraði fyrirliði liðsins, Sveinn Brynjar, úr lokaskoti leiksins þegar aðeins þrjár sekúndur voru eftir.

En hvernig leið Bjarna meðan á leik stóð?

„Tilfinningin var góð. Ég var aðallega ánægður með hvernig við framkvæmdum sóknarplanið og varnarplanið og mér fannst spennustigið ótrúlega gott. Þeir voru með mikla orku en voru ekki á einhverjum yfirsnúningi. Það var í raun og veru það sem ég vildi, bara setja mikla orku í þetta. Mér fannst það takast fullkomlega. Þeir eru bara að fara inn í leikinn með þvílíkt sjálfstraust og að halda haus þegar á reynir sem gerist alltaf á móti svona frábæru liði. Ég gæti ekki verið stoltari af þeim.“

Sonurinn meiddist

Snemma leiks meiddist sonur Bjarna, Baldur Fritz, og tók ekki frekari þátt í leiknum. ÍR missti þar með sinn allra besta leikmann út úr leiknum. Það virtist hafa lítil áhrif á ÍR-liðið, en af hverju?

„Hann byrjaði leikinn náttúrulega frábærlega, þannig að það var algjör synd að missa hann. Elvar er mjög góður leikmaður og kom með frábæra innkomu. Mér fannst bara liðið gott, þetta snýst um það. Þetta er liðssport, maður í manns stað og allt það.“

Aðspurður hvernig taugarnar voru þegar Sveinn Brynjar fór inn úr horninu á lokaandartökum leiksins, sagðist hann þær vera góðar.

Ég var líka svo ánægður

„Góðar, þær voru alveg góðar. Mér leið bara vel. Sveinn hefur alveg verið að skora úr svona færum. Ég var líka svo ánægður, ég bað þá um að vera rólegir og gefa bara eitt skot í lokin en Bernard var bara „áfram, áfram komdu með boltann, ég er með þetta“. Svoleiðis eru sigurvegarar, þeir vilja bara vinna leikinn. Ég vil frekar hafa þá þannig heldur en hikandi.“

ÍR mun mæta Haukum í úrslitaleik á laugardaginn um bikarinn. Leggst sá leikur vel í Bjarna.

„Það leggst vel í mig. Ég hugsaði þetta, þetta er svo góð reynsla fyrir þá, svo gott tækifæri til að læra og verða betri og upplifa svona móment. Það gefur þér svo mikið. Fyrst og fremst er það bara þakklæti fyrir það. Við munum undirbúa okkur eins vel og við getum og spilum svo bara leikinn.“