Þór styrkti Kvenna­at­hvarfið og fær að halda pútt­ernum

Þór sagði í samtali við þá Loga Bergmann og Jón Júlíus Karlsson, umsjónarmenn golfhlaðvarpsins Seinni níu, hafa tekið golfkylfuna árið 2017, og áætlar að hún hefði kostað um 90.000 krónur ný út úr verslun.

Púttaði eins og engill með illa fenginn pútter

Að sögn Gunnars Dofra Ólafssonar sviðsstjóra þjónustu- og samskiptasviðs Sorpu, er ekki heimilt að taka hluti úr nytjagámum Sorpu. Allt nýtilegt fer þaðan í Góða hirðinn þar sem hlutirnir eru seldir. En Þór sagðist hafa sett talsvert meira í gáminn en svo og tók á þeim forsendum glænýjan Odyssey-pútter með góðri samvisku úr golfsetti sem hann fann í gámnum og henti inn í bíl sinn. Þór púttar eins og engill síðan og heldur sig í 22 í forgjöf.

Það var hins vegar ekki fyrr en Vísir fjallaði um málið að Þór gerði sér grein fyrir því að þetta væri kannski ekki alveg eins einfalt og hann hugði.

Millifærði andvirðið inn á reikning Kvennaathvarfsins

Góði hirðirinn, sem er hluti af Sorpu, gefur hagnað af starfsemi sinni til góðra málefna. Sorpa og Þór komust að samkomulagi um að ljúka málinu þannig að Þór fengi að halda kylfunni gegn því að styrkja góðgerðarfélag að eigin vali um andvirði kylfunnar. Úr varð að Þór millifærði krónurnar 90.000 á Kvennaathvarfið, sem nýtur stuðnings endurnotaverslunar Elley á Seltjarnarnesi, sem selur notuð föt.

Gunnar Dofri segir að á næstu mánuðum muni aðgengi viðskiptavina Góða hirðisins að versluninni aukast til muna. „Í vor opnar Góði hirðirinn útibú á endurvinnslustöð Sorpu á Breiðhellu í Hafnarfirði, og samhliða opnun nýrrar endurvinnslustöðvar Sorpu við Lambhagaveg í sumar opnar Góði hirðirinn útibú þar,“ segir Gunnar Dofri og er ánægður með málalyktir.