„Hann er rosa­legur“

„Við erum að reyna að tryggja okkur inn í úrslitakeppni og hver einasti leikur skiptir gríðarlega miklu máli. Við eigum ekki auðvelt prógramm eftir þannig það var mjög stórt að fá sigur. Sama hvernig hann kom,“ sagði Hákon í leikslok.

ÍR-ingar byrjuðu leikinn af miklum krafti og náðu fljótt tíu stiga forskoti. Þeir lentu hins vegar fljótlega undir og voru að elta stærstan hluta leiksins, eða alveg þangað til í 4. leikhluta.

„Stór partur af þessu var bara að hitta úr skotum. Þeir skutu 50 prósent í fyrri hálfleik úr þristum og enda leikinn að ég held í kringum 30-35 prósent ef ég ætti að giska á það. Þetta liggur held ég bara þar. Þeir skoruðu 50 stig í fyrri hálfleik en enda leikinn með 83 stig. Stundum er það þannig bara, hvort þeir hitta eða ekki.“ 

„Mér fannst við vera með gott gameplan. Breyttum svolítið pick and roll vörninni og Borche setti upp nýja vörn sem virkaði ágætlega. Svo breyttum við aðeins til þegar stóri maðurinn þeirra fór út af og fórum aftur í það sem við erum vanir. Það virkaði í dag og við settum líka bara stóru skotin. Eða, Jake (Jacob Falko) setti stóru skotin.“

Þá lá ekki á svörum þegar Hákon var spurður út í það hvort það væri ekki ágætt að eiga mann eins og Falko inni í jöfnum leik.

„Hann er rosalegur,“ sagði Hákon einfaldlega.

ÍR-ingar eru í harðri baráttu um sæti í úrslitakeppninni og mæta Álftnesingum, sem eru tveimur stigum á eftir ÍR, næst.

„Þeir eru með gríðarlega sterkan hóp og við þurfum klárlega að mæta betur til leiks í næstu viku en við gerðum í dag til að eiga séns í þann leik,“ sagði Hákon að lokum.