Dag­skráin: Hákon gegn Villa, Elías gegn Forest og mikið undir í Bónus-deildinni

Sýn Sport

Í Evrópudeildinni mætast Lille og Aston Villa klukkan 17:45, þar sem fróðlegt verður að sjá Hákon Arnar Haraldsson glíma við leikmenn enska liðsins. Klukkan 20 mætast svo Celta og Lyon í sömu keppni.

Sýn Sport 2

Fleiri Íslendingar eru á ferðinni í kvöld því Lech Poznan, lið Gísla Gottskálks Þórðarsonar, tekur á móti Shaktar í Sambandsdeildinni klukkan 17:45 og Fiorentina, lið Alberts Guðmundssonar, mætir svo Rakow klukkan 20.

Sýn Sport Viaplay

Sverrir Ingi Ingason reynir svo að kæta Rafa Benítez stjóra sinn þegar Panathinaikos tekur á móti Real Betis klukkan 17:45 í Evrópudeildinni. Elías Rafn Ólafsson og félagar í Midtjylland eiga svo leik við Nottingham Forest klukkan 20, í Nottingham, sem spennandi verður að sjá. Elías hefur áður fagnað sigri gegn Forest í vetur. NHL og æfing í Formúlu 1 taka svo við í nótt.

Sýn Sport Ísland

Skiptiborðið verður á sínum stað og hefst klukkan 19:10, þar sem fylgst er með gangi mála í fjórum leikjum í einu í Bónus-deild karla, nú þegar styttist í lok deildakeppninnar. Óhætt er að segja að mikið sé í húfi en hægt er að sjá hvern leik fyrir sig á hliðarrásum.

KR mætir Keflavík í leik liðanna í 6. og 5. sæti, Þór Þ. og Ármann mætast þar sem Ármenningar gætu með sigri sent Þór í fallsæti, og Álftanes mætir ÍR í leik liða sem eru í rosalegri baráttu um sæti í úrslitakeppninni. Þá mætast einnig Njarðvik og Valur sem sömuleiðis hafa að miklu að keppa.

Allir leikirnir verða svo gerðir upp í Tilþrifunum um klukkan 21:10.

Upplýsingar um allar beinar útsendingar Sýnar má sjá með því að smella hér.