Íslendingaliðin undir í einvígum sínum

Kristján Örn Kristjánsson, Donni, var í leikmannahópi danska liðsins SAH sem átti erfitt verkefni fyrir höndum á heimavelli gegn þýska úrvalsdeildarfélaginu Flensburg. 

Jafnræði var með liðunum til að byrja með en eftir því sem leið á leikinn óx Flensburg ásmegin og fór svo að þýska liðið fór með sex marka sigur af hólmi, 32-38 og leiðir því einvígið fyrir seinni leik liðanna í Þýskalandi í næstu viku. Donni skoraði eitt mark í leiknum. 

Þá var Einar Bragi Aðalsteinsson í eldlínunni með Kristianstad sem tók á móti króatíska liðinu Nexe. Einar Bragi kom að alls fimm mörkum í leiknum, skoraði tvö og lagði upp þrjú, í tveggja marka tapi Kristianstad, 34-36. Liðin mætast í Króatíu í næstu viku.