Skoruðu í Reykja­vík og unnu í Hafnar­firði

Fylkismenn komust með sigrinum í 16-liða úrslit keppninnar og halda því áfram að gera vel á sinni fyrstu leiktíð undir stjórn Heimis Guðjónssonar, eftir að hafa orðið deildabikarmeistarar í fyrsta sinn á dögunum.

Leikur liðanna í dag hófst í Árbænum og þar komst Fylkir yfir strax á 1. mínútu með marki sem skráð er sem sjálfsmark Milan Jelovac, markvarðar Austfirðinga.

Eftir tuttugu mínútna leik, þar sem mikil snjókoma var farin að setja mark sitt á leikinn og línur vallarins ekki lengur sjáanlegar, ákvað Gunnar Oddur Hafliðason dómari að stöðva leikinn.

Brugðið var á það ráð að færa leikinn svo inn í Skessuna í Hafnarfirði. Það gekk skjótt og Fylkismönnum tókst svo fljótlega að bæta við öðru marki, nú innandyra, þegar Guðmundur Tyrfingsson skoraði á 32. mínútu leiksins.

Fylkismenn héldu svo forskotinu út leikinn og eru komnir áfram í næstu umferð.