Dagskráin: Geta Liverpool og Barcelona komið til baka í Meistaradeildinni?

Óskar Ófeigur Jónsson skrifar 14. apríl 2026 06:02

Rio Ngumoha átti sinn þátt í báðum mörkum Liverpool um helgina þó sérstaklega fyrra markinu sem hann skoraði upp á sitt einsdæmi. Getty/Liverpool FC

Það eru beinar útsendingar á sportstöðvunum í dag og kvöld eins og vanalega á þriðjudögum.

Nú er komið að úrslitastundu í átta liða úrslitum Meistaradeildar Evrópu en þá fara fram seinni leikirnir í tveimur af viðureignunum fjórum.

Stórliðin Liverpool og Barcelona eru bæði tveimur mörkum undir eftir fyrri leikinn og Börsungar eru auk þess á útivelli. Liverpool nýtur góðs af því að vera að spila á Anfield eftir að hafa tapað 2-0 í fyrri leiknum á móti Paris-Saint Germain í París.

Barcelona tapaði á sama tíma 2-0 á heimavelli á móti Atletico Madrid og heimsækir því lærisveina Diego Simeone á Metropolitano-leikvanginn.

Upphitun fyrir leiki kvöldsins hefst klukkan 18.30 og eftir leikinn munu Meistaradeildarmörkin gera allt kvöldið upp eða frá klukkan 21.00. Það gæti auðvitað breyst eitthvað ef framlengingar fara að flækja málið.

Grindavík og Stjarnan geta bæði tryggt sér sæti í undanúrslitum Bónusdeildar karla en þau eru bæði 2-1 yfir í einvígum sínum í átta liða úrslitunum.

Mótherjar þeirra, Njarðvík og KR, búa að því að vera á heimavelli í kvöld og tryggja sér því oddaleik með sigri. Ef ekki þá eru þau á leiðinni í sumarfrí.

Það má einnig sjá á KKÍ TV annan leik Fjölnis og Hamars/Þórs í baráttunni um laust sæti í Bónus-deild kvenna í körfubolta á næstu leiktíð. Hamar/Þór vann leik eitt en það lið sem fyrr vinnur þrjá leiki verður í deild þeirra bestu 2026-27.

Hér fyrir neðan má sjá yfirlit yfir beinar útsendingar á sportstöðvunum í dag.