Gætu grætt á því að tapa

Handboltafréttamaðurinn Rasmus Boysen bendir á þessa óheppilegu stöðu í færslu á X og segir að í íþróttum ætti það aldrei að gagnast liðum að tapa. Það sé hins vegar staðan núna.

Kiel er nefnilega í 5. sæti þýsku deildarinnar með 40 stig og á ekki raunhæfa möguleika á að ná öðru af tveimur efstu sætunum sem gefa sæti í Meistaradeild Evrópu á næstu leiktíð.

En Kiel er líka í undanúrslitum Evrópudeildarinnar og með því að vinna þá keppni gæti liðið mögulega fengið sæti í Meistaradeildinni.

Það gerist þó ekki nema að sigurlið Meistaradeildarinnar í ár verði annað hvort ekki þýskt eða þá þýskt lið sem endar í 1. eða 2. sæti þýsku deildarinnar.

Sem sagt, Kiel vill vinna Evrópudeildina og treysta á að Füchse Berlín vinni ekki Meistaradeildina samhliða því að enda neðar en í 2. sæti þýsku deildarinnar.

Füchse er sem stendur í 3. sæti þýsku deildarinnar, stigi á eftir Flensburg, og Kiel gæti því hjálpað Füchse upp í 2. sæti með því að tapa leiknum á sunnudaginn.