Fann ást­ríðuna á ný eftir að hafa yfir­gefið LIV

Koepka yfirgaf PGA-mótaröðina fyrir LIV árið 2022. Hann fór ekki leynt með að ástæðan væri peningar enda fékk hann 100 milljónir dollara fyrir að koma yfir til Sádi Arabíu.

Hann spilaði fyrir LIV í þrjú ár og á þeim tíma vann hann einn af fimm risatitlum sínum. Spilamennskan almennt fór þá niður á við hjá honum. Hann ákvað því að yfirgefa LIV í desember og fara aftur í hlýjan faðm PGA-mótaraðarinnar.

„Ég hef ekki verið svona spenntur að spila golf í langan tíma,“ sagði Koepka á PGA-móti um helgina. „Núna finnst mér raunverulega gaman að spila golf. Það hefur ekki verið þannig í að minnsta kosti ár. Ég var ekki á góðum stað.“

Nú er hann meira með fjölskyldunni og nýtur lífsins.

„Ef maður er hamingjusamur utan vallarins þá spilar maður betur. Ég er búinn að finna hamingjuna á nýjan leik og ástina á leiknum.“