Gift svo góðum grillara og sér því meira um innivinnuna

Í kaffispjalli um helgar er rætt við fólk í ólíkum störfum. Við spyrjum alltaf hvenær fólk vaknar á morgnana, hvað er það fyrsta sem það gerir þá og hvenær fólk fer að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég hef alltaf verið algjör B-manneskja og þegar dæturnar voru litlar var ég yfirleitt að hangsa eða vinna langt fram yfir miðnætti og vel það, það var oft minn mesti sköpunartími og ég kom oft miklu í verk, enda mesti friðurinn þegar þær voru sofnaðar. Þar af leiðandi fannst mér ekkert spennandi að fara á fætur mjög snemma á þeim árum. 

En það hefur nú breyst með aldrinum og mín innri vekjaraklukka er yfirleitt búin að vekja mig um klukkan 8, svona þegar ekkert sérstakt liggur fyrir eins og til dæmis fyrirlestur eða fundir, en þá er nú ræs töluvert fyrr.“

Hvað er það fyrsta sem þú gerir á morgnana?

Ég væri nú alveg til í að morgunrútínan væri aðeins göfugri, með hugleiðslu, jóga og dagbókarskrifum, en hún er voðalega einföld. Það fyrsta sem ég geri er að kveikja á katlinum og gera mér te, ég drekk alltaf tvo bolla af grænu tei meðan ég er að vakna, á meðan dett ég nú aðeins í að skrolla símann, en er alltaf með hugmyndir um að hætta þeirri vitleysu þar sem það getur teygt svolítið á tedrykkjunni. 

En oft sest ég með tebollann við tölvuna og svara skilaboðum og tölvupóstum á náttfötunum, þangað til ég skipti yfir í ræktarfötin.“

Á skalanum 0-10, hversu góður grillari ertu?

„Ég held ég væri mjög góð á grillinu, en það er orðið nokkuð langt síðan ég hef spreytt mig þar þar sem ég er gift svo góðum grillara, en ég sé oftast um innivinnuna við grillmáltíðina, sem er nú mjög mikilvægur partur af heildarupplifuninni og þar myndi ég nú allavega gefa mér 9-10.“

Í hvaða verkefni ertu að vinna helst í þessa dagana?

„Mitt helsta hugðarefni er breytingaskeiðið og síðustu þrjú til fjögur ár hef ég mikið verið að einbeita mér að því að fræða vinnustaði og stjórnendur um áhrifin sem hormónabreytingar geta haft inni á vinnustaðnum, ekki bara hormónabreytingar hjá konum heldur hjá körlum líka. Í kjölfarið hef ég síðan aðstoðað fyrirtæki við að setja breytingaskeiðið inn í heilsustefnuna til þess að styðja betur við þetta fólk. 

Ég var því gríðarlega spennt þegar Staðlaráð Íslands hafði samband og bað mig um að vinna með þeim að því að þýða staðal frá Breska staðlaráðinu varðandi tíðaheilsu og breytingaskeiðið fyrir vinnustaði. Þessi staðall verður gefinn út í haust og mun verða aðgengilegur öllum fyrirtækjum og þjóna sem næstkomandi leiðarvísir að því að gera vinnustaðinn tíða- og breytingaskeiðsvænan.“

Hvernig skipuleggur þú þig í vinnu?

„Dagatalið í símanum er algjörlega minn besti vinur, þar set ég allt inn og helst með áminningum með góðum fyrirvara, en það er svo merkilegt að þegar ég er búin að setja þar inn þá er það líka límt í hausinn á mér þannig að yfirleitt man ég hlutina löngu áður en síminn minnir mig á.

Ég hef unnið hjá sjálfri mér meira og minna síðan ég var 25 ára, einu sinni vann ég mikið eftir stundaskrá þar sem ég setti inn öll verkefni. 

En í dag finnst mér best að lista allt niður á autt blað, strika síðan yfir verkefnin þegar þau klárast, sem ég elska, það gefur manni smá dópamínbúst, stundum skrifa ég jafnvel niður hluti eftir á bara til þess að fá kikkið af því að strika yfir.“

Hvenær ferðu að sofa á kvöldin?

„Ég er oftast að skrölta inn í rúm að nálgast ellefu, sem betur fer er maðurinn minn frekar kvöldsvæfur, annars færi ég pottþétt mun seinna að sofa.“