„Það er tilfinningaþrungið að kveðja Old Trafford“

Daninn var á láni hjá Napoli frá Manchester United á síðasta tímabili og skoraði 16 mörk í 44 leikjum. Hann var mikilvægur hlekkur í að tryggja liðinu annað sætið í Seríu A og tryggja þar með þátttöku í Meistaradeildinni á komandi tímabili.

Fjölmargir fjölmiðlar hafa greint frá því að ákvæði í samningnum hafi gert félagaskiptin varanleg og á miðvikudag staðfesti United að félagið hefði látið hann fara.

„Allir hjá félaginu óska Rasmus alls hins besta í framtíðinni,“ segir í tilkynningu á vefsíðu United.

Höjlund kom til United frá Atalanta árið 2023 en sló aldrei í gegn á Old Trafford. Nú heldur hann áfram ferli sínum á Ítalíu.

„Það er tilfinningaþrungið að kveðja Old Trafford. Þar lét ég æskudraum minn rætast,“ skrifaði Höjlund í færslu á Instagram.

Danski framherjinn lék alls 95 leiki í öllum keppnum með Manchester United og skoraði í þeim 26 mörk þar af 14 mörk í 62 leikjum í ensku úrvalsdeildinni.