Unnu sinn besta sigur frá upp­hafi

Fyrir mótið var Kósovó í 87. sæti heimslistans en Ísland í 113. sæti, sem gerir 2-1 sigur Íslands að þeim fræknasta í sögu kvennalandsliðsins, samkvæmt tilkynningu tennissambandsins.

Liðin mættust í 3. deild Evrópu þar sem Anna Soffía Grönholm byrjaði á að vinna Forta Morina með afar öruggum hætti, 6-1 og 6-0. Anna Soffía setti 60% af fyrstu uppgjöfum sínum inn, vann 74% stiga á fyrstu uppgjöf og alls 59 stig gegn 35 hjá andstæðingi sínum. Hún nýtti einnig sjö af fimmtán brotfærum sínum og lagði þannig grunninn að íslenska sigrinum.

Lengsti leikur í sögu landsliðsins

Bryndís Rósa Armesto Nuevo lék svo seinni einliðaleikinn og fer hann í sögubækurnar sem lengsti einliðaleikur íslenskrar tenniskonu í landsliðsverkefni, því hann stóð yfir í 3 klukkustundir og 4 mínútur.

Bryndís Rósa varð að lokum að játa sig sigraða; 4-6, 6-3, 7-6, eftir að hafa fengið samtals 103 stig gegn 104 í leik þar sem staðan sveiflaðist fram og til baka.

Úrslitin réðust því í tvíliðaleiknum þar sem þær Anna Soffía og Sofia Sóley Jónasdóttir sameinuðu krafta sína gegn Altea Hajrizi og Aja Broqi. Íslenska parið vann þar, 6-3 og 6-3. Þær unnu 58 stig gegn 41 hjá andstæðingunum, voru með 62% fyrstu uppgjöf og nýttu sex af níu brotfærum sínum. 

Sigurinn tryggði Íslandi annað sætið í riðlinum og einn eftirminnilegasta sigur í sögu íslensks kvennatennis. Liðið mun nú spila um 5.-8. sæti mótsins.

Karlalandsliðið keppir í 4. deild Evrópu í Davis Cup í Armeníu og tapaði þar naumlega fyrir heimamönnum, 2-1. Ísland hefur unnið tvo leiki en tapað einum og á nú eftir leiki við Möltu í dag og Andorra á morgun. Sigur gegn Möltu kæmi Íslandi í baráttu um annað af tveimur efstu sætunum og gæti gert lokaleikinn við Andorra að hreinum úrslitaleik um sæti í 3. deild Evrópu.