Fresta opnun Sundhallar Reykja­víkur

„Viðhaldsvinna sem hefur staðið yfir í Sundhöll Reykjavíkur hefur gengið vel en þó hafa komið upp nokkur ófyrirséð atriði sem kallað hafa á umfangsmeiri framkvæmdir í búningsklefum en upphaflega var gert ráð fyrir. Af þeim sökum verður ekki hægt að opna Sundhöllina aftur mánudaginn 22. júní líkt og áður hafði verið auglýst,“ segir í tilkynningu frá borginni.

Þar kemur einnig fram að allt kapp sé lagt á að ljúka þeim framkvæmdum sem eftir standa og stefnt er að opnun seinni partinn í næstu viku. Nánari upplýsingar verði birtar um leið og sú tímasetning liggur fyrir.

„Við biðjumst velvirðingar á þeim óþægindum sem þetta kanna að valda og þökkum gestum fyrir þolinmæði og skilning á meðan á viðhaldsvinnu stendur,“ segir að lokum.