Brynja til Fastus frá Samkaupum

Í tilkynningu segir að Brynja Rut sé með víðtæka reynslu í aðfanga- og birgðastýringu og gagnadrifnum rekstri fyrirtækja.

„Brynja kemur til Fastus frá Samkaupum þar sem hún starfaði síðast sem rekstrareftirlitsstjóri. Hún hafði fyrir það sinnt ýmsum hlutverkum í gegnum miklar breytingar hjá Samkaupum, og vann m.a. að gagnadrifnum rekstri, greiningum og birgðastýringu hjá fyrirtækinu. Þar áður starfaði Brynja sem ráðgjafi hjá AGR, fyrst í Danmörku, þar sem hún vann með viðskiptavinum víðsvegar á Norðurlöndunum, og síðar á Íslandi. Þá var hún einnig stundakennari í HR samhliða störfum fyrir AGR og kenndi námskeiðið Framleiðsla og birgðastýring.

Brynja er rekstrarverkfræðingur að mennt. Hún er með BSc gráðu frá Háskólanum í Reykjavík og meistaragráðu frá DTU í Danmörku,“ segir í tilkynningunni. 

Um Fastus segir að það sé sölu- og þjónustufyrirtæki á vörum og búnaði fyrir fyrirtæki og fagaðila. Fyrirtækið skiptist í Fastus heilsu, sem þjónustar og sérhæfir sig í vörum og ráðgjöf fyrir heilbrigðisgeirann, og Fastus lausnir, sem sér um þjónustu og ráðgjöf fyrir veitingastaði, hótel og fyrirtæki.