Dóra Björt ráðin deildar­stjóri

Í tilkynningu þess efnis á vef Rauða krossins segir að höfuðborgardeild Rauða krossins sé stærsta deild félagsins og sinni fjölmörgum mannúðarverkefnum á höfuðborgarsvæðinu öllu. Starfsmenn séu um 35 talsins og sjálfboðaliðar um 600.

Undir deildina heyri skaðaminnkunarverkefnin Ylja og Frú Ragnheiður, verkefni tengd félagslegum stuðningi við flóttafólk sem og við fólk sem er að afplána fangelsisdóma eða hefur nýlokið þeim. Þá haldi deildin úti margvíslegum félagslegum verkefnum, svokölluðum vinaverkefnum, sem miða að því að auka virkni fólks og rjúfa félagslega einangrun þess. Einnig heyri kvennadeild, sem nú hafi starfað í sextíu ár, undir höfuðborgardeildina.

Dóra Björt sé með BA-gráður í bæði heimspeki og alþjóðafræðum frá Óslóarháskóla og diplómu á meistarastigi í alþjóðasamskiptum frá Háskóla Íslands. Hún sé 38 ára.

Dóra búi að fjölbreyttri reynslu þar sem mannréttindi, félagsleg þátttaka og þjónusta við ólíka hópa séu grunnstef. Í átta ár hafi hún gengt ýmsum leiðtogahlutverkum sem borgarfulltrúi í borgarstjórn og sem oddviti og formaður fagráða, stýrihópa og stjórna fyrirtækja.

Í þeim störfum hafi hún meðal annars beitt sér fyrir því að skaðaminnkun yrði skilgreind sem leiðarljós í velferðarstefnu borgarinnar og stutt uppbyggingu „Húsnæði fyrst“-úrræða. Þá hafi hún einnig unnið að mannréttinda- og jafnréttismálum á vettvangi félagasamtaka, bæði á Íslandi og í Noregi.

„Ég hef lengi haft brennandi áhuga á samfélagsmálum, mannréttindum og þjónustu við fólk í viðkvæmri stöðu. Því er það bæði mikill heiður og mikil ábyrgð að fá tækifæri til að leiða höfuðborgardeild Rauða krossins. Rauði krossinn gegnir einstöku og mikilvægu hlutverki, bæði í íslensku samfélagi og á alþjóðavísu, og ég hlakka til að vinna með öflugu starfsfólki, sjálfboðaliðum og samstarfsaðilum. Markmið mitt verður að byggja á þeim sterka grunni sem þegar hefur verið lagður, styðja við starfsfólk og sjálfboðaliða og leggja mitt af mörkum til að þróa starfsemina áfram þannig að hún nýtist sem best þeim sem á henni þurfa að halda, í anda mannúðar, fagmennsku og virðingar,“ er haft eftir Dóru Björtu.

Loks segir að Rauði krossinn hlakki til samstarfsins við Dóru Björtu og þakki Ósk Sigurðardóttur, fráfarandi deildarstjóra, jafnframt kærlega fyrir samstarfið og óski henni velfarnaðar á nýjum vettvangi.